Ekitebyo 51

Ruusi na Naomi

OMURI Baibuli, noija kushangamu ekitabo ekirikwetwa Ruusi. Nikigamba aha ka eyaabaire eriho obu Israeli yaabaire eine abaramuzi. Ruusi n’omukazi muto kuruga omu nsi ya Moabu; tari w’omu Israeli ensi ya Ruhanga. Kwonka Ruusi ku yaayegire ebirikukwata ahari Yehova Ruhanga ow’amazima, yaamukunda munonga. Naomi n’omukaikuru owaayambire Ruusi okwega ebirikukwata ahari Yehova.

Naomi n’Omuisraelikazi. We n’iba hamwe n’abatabani babiri bakafurukira omu nsi ya Moabu obu enjara yaabaire eteire omuri Israeli. Mbwenu eizooba rimwe, iba wa Naomi akafa. Bwanyima batabani ba Naomi bakashwera abakazi babiri Abamoabu abarikwetwa Ruusi na Orupa. Kwonka bwanyima y’emyaka nka 10, batabani ba Naomi bombi bakafa. Ku kyabaire eky’obusaasi munonga ahari Naomi n’ahari aba bakazi babiri! N’enki eki Naomi yaabaire naaza kukora hati?

Eizooba rimwe, Naomi acwamu kugaruka owaabo omu bantu be. Ruusi na Orupa nibenda kuguma nawe, kandi n’ahabw’ekyo nabo bagyenda nawe. Kwonka bwanyima y’okugyendaho akaanya, Naomi ahindukira abakazi aba abagira ati: ‘Mwirooko, mugarukye owaanyu mugume na baanyokoimwe.’

Naomi abanywegyera arikubasiibura. Aho batandika kurira, ahabw’okuba bakaba nibakunda Naomi munonga. Bagira bati: ‘Ngaaha! Nitwija kugyenda naiwe omu bantu b’owaanyu.’ Kwonka Naomi abagarukamu ati: ‘Baana bangye, mugyende, mugarukyeyo. Niimwija kuba gye omuka owaanyu.’ N’ahabw’ekyo Orupa akwata omuhanda agaruka owaabo. Kwonka Ruusi ayanga kugarukayo.

Naomi ahindukira Ruusi amugira ati: ‘Reeba Orupa yaagyenda. Naiwe irooko ogyende owaanyu.’ Kwonka Ruusi amugarukamu ati: ‘Reka kunzibira kugyenda naiwe! Reka ngyende naiwe. Ahu oriza, naanye niho ndiza, kandi ahu orituura okwo naanye niyo ndituura. Abantu baawe baryaba abantu bangye, kandi Ruhanga waawe aryaba Ruhanga wangye. Ei orifeera naanye niyo ndifeera kandi okwo niyo ndiziikwa.’ Ruusi ku agamba ebi, Naomi tagaruka kumugira ngu agyende agarukye owaabo.

Aha muheru aba bakazi babiri bahika Israeli. Batebeekana batuura okwo. Ruusi atandikiraho kukora omu misiri, ahabw’okuba n’obunaku bw’okushaaruura engano. Omushaija orikwetwa Boazi aikiriza Ruusi kunshanguruza engano kuruga omu musiri gwe. Noomanya nyina wa Boazi? Akaba ari Rahabu ow’omu rurembo Yeriko.

Eizooba rimwe Boazi agambira Ruusi ati: ‘Mpuriire byona ebirikukukwataho, n’oku otwire ori ow’embabazi ahari Naomi. Nimmanya oku waarekire sho na nyoko n’ensi yaawe n’oku waizire kutuura omu bantu abu waabaire otakamanyaga. Yehova akubeere murungi!’

Ruusi amugarukamu ati: ‘Waangirira embabazi, sebo. Omuringo murungi ogu waagambamu naanye gwampumuriza.’ Boazi akunda Ruusi munonga, kandi tiharahweireho obwire bwingi bashwerana. Eki ka kyashemeize Naomi! Kwonka Naomi akashemererwa n’okukiraho obu Ruusi na Boazi baazaara omwana waabo w’okubanza orikwetwa Obedi. Bwanyima Obedi akaba mwijukuru wa Daudi, ou turaije kwegaho bingi bwanyima.

Ekitabo kya Ruusi 1-4.