Ruusi na Naomi

Obu haabaire hariho enjara omuri Israeli, Omwisraeli orikwetwa Naomi akaza omu nsi ya Moabu na iba hamwe n’abatabani baabo babiri. Ku haahingwireho obwire iba wa Naomi akafa. Abatabani bakashwera Ruusi na Orupa, aba Moabu. Eky’obusaasi, ku haahingwireho obwire, batabani ba Naomi nabo bakafa.

Naomi ku yaamanyire ngu omuri Israeli enjara t’ekiriyo, akacwamu kugarukayo. Ruusi na Orupa bakagarukayo nawe, kwonka ku baabaire nibagyenda, Naomi akabagira ati: ‘Mukaba muri abakazi barungi ba batabani bangye kandi muri abakamwana bangye barungi. Niinyenda mwembi mugarukye mushwerwe. Mugarukye Moabu.’ Bakamugarukamu bati: ‘Nitukukunda. Titurikwenda kukutsigaho.’ Naomi akaguma naabagambira ngu bagyende. Bwanyima, Orupa akagarukayo, kwonka Ruusi akanga. Naomi akagira Ruusi ati: ‘Reeba Orupa yaagaruka omuri beene waanyu, n’ahari ruhanga waanyu; naiwe garukayo.’ Kwonka Ruusi akamugarukamu ati: ‘Tindikwija kukutsigaho. Abantu baawe nibo bariba abantu bangye, kandi Ruhanga waawe niwe ariba Ruhanga wangye.’ Nooteekateeka ngu Naomi akeehurira ata Ruusi ku yaamugarukiremu atyo?

Ruusi na Naomi bakahika omuri Israeli aha kutandika kw’eisharura rya sayiri. Eizooba rimwe, Ruusi akaza kuhumba sayiri omu musiri gw’omushaija orikwetwa Boazi, owaabaire ari mutabani wa Rahabu. Akahurira ngu Ruusi akaba naaruga Moabu kandi ngu akaguma ari omwesigwa ahari Naomi. Akagambira abakozi be kumutsigira sayiri z’okuhumba omu musiri.

Omwabazyo ogwo, Naomi akabuuza Ruusi ati: ‘Waaza omu musiri gw’oha eri izooba?’ Ruusi akamugarukamu ati: ‘Omu musiri gw’omushaija orikwetwa Boazi.’ Naomi akamugira ati: ‘Boazi n’omwe aha banyabuzaare ba ibanyi. Guma nooza omu musiri gwe n’abazaana be. Noija kutungirayo oburinzi.’

Ruusi akaguma naaza omu musiri gwa Boazi kuhitsya aha muheru gw’eisharuura. Boazi akeetegyereza ngu Ruusi n’omukazi w’omutima kandi omukozi. Omu bunaku obwo, omushaija ku yaabaire afa atakazaire mwojo, omunyabuzaare we akaba ataha omu bushwere n’omukazi we. N’ahabw’ekyo Boazi akataha omu bushwere na Ruusi. Bakazaara omwana orikwetwa Obedi, owaabaire ishenkuru w’Omugabe Daudi. Banywani ba Naomi bakashemererwa munonga. Bakagira bati: ‘Omu kubanza, Yehova akakuha Ruusi, owaakugirire embabazi, kandi hati otungire omwijukuru. Yehova ahimbisibwe.’