Ekitebyo 57

Ruhanga Okutoorana Daudi

NOOBAASA kureeba ekyabaho? Omwojo ogwo yaajuna ogu mwana gw’entaama kuruga omu kanwa k’edubu. Edubu ekaija yaatwara ogwo mwana gw’entaama kandi ekaba neeza kugurya. Kwonka omwojo akagiirutsya, atyo yaajuna omwana gw’entaama kuruga omu kanwa k’edubu. Edubu ku yaimukire, omwojo yaagikwata atyo yaagiita! Aha murundi ogundi akajuna emwe aha ntaama kuruga aha kicuncu. Ogu mwojo t’emanzi? Nomumanya?

Ogu n’omuto Daudi. Naatuura omu tauni ya Betelehemu. Ishenkuru akaba ari Obedi, mutabani wa Ruusi na Boazi. Nokibaijuka? Kandi Ishe wa Daudi ni Yese. Daudi naariisa entaama z’ishe. Daudi akazaarwa emyaka 10 bwanyima ya Yehova okutoorana Saulo kuba omugabe.

Obunaku bukahika obu Yehova yaagambiire Samueli ati: ‘Twara gamwe aha majuta marungi kandi oze omu nju ya Yese omuri Betelehemu. Ntooraine omwe aha batabani kuba omugabe.’ Samueli ku yaareebire mutabani wa Yese omukuru Eliabu, yaagira aha mutima gwe ati: ‘Buzimazima ogu niwe Yehova atooraine.’ Kwonka Yehova yaamugira ati: ‘Otareeba oburungi bwe n’ekyemerero kye. Ogwo tiwe ntooraine kuba omugabe.’

N’ahabw’ekyo, Yese yaayeta omutabani Abinadabu kandi yaamureetera Samueli. Kwonka Samueli yaamugira ati: ‘Ngaaha, n’ogu tiwe Yehova atooraine.’ Bwanyima, Yese yaareeta omutabani Shaama. ‘N’ogu, tiwe Yehova atooraine.’ Yese yaareetera Samueli abatabani be boona mushanju, kwonka tayaagira u yaatooranamu. Samueli yaabuuza ati: ‘Abo nibo boojo bonka abu oine?’

Yese yaagira ati: ‘Haatsigarayo omuto, kwonka ariisize entaama.’ Daudi ku baamureetsire, Samueli yaareeba ku ari omwojo murungi. Yehova yaagira ati: ‘Niwe ogu, mushukyeho amajuta.’ Kandi eki Samueli yaaba nikyo yaakora. Obunaku nibwija kuhika obu Daudi araije kuba omugabe wa Israeli.

1 Samueli 17:34, 35; 16:1-13.