Omugabe wa Israeli ow’Okubanza

Yehova akaba naakoresa abaramuzi kwebembera Abaisraeli, kwonka bo bakaba nibenda omugabe. Bakagira Samueli bati: ‘Amahanga agatwehinguririize goona gaine abagabe. Naitwe nitumwenda.’ Samueli akamanya ngu eki kikaba kitahikire, akashaba Yehova aha bikwatiraine n’enshonga egyo. Yehova akamugira ati: ‘Abantu tiiwe bangire. Niinye bangire. Bagire ngu nibabaasa kutunga omugabe kwonka omugabe naija kubashaba ebintu bingi.’ Kwonka abantu bakamugira bati: ‘Itwe titurikufayo. Nitwenda omugabe.’

Yehova akagambira Samueli ngu omushaija orikwetwa Saulo naija kuba omugabe w’okubanza. Saulo ku yaagiire kutaayaayira Samueli omuri Raama, Samueli akashuka amajuta aha mutwe gwa Saulo, yaaba omugabe.

Bwanyima Samueli akateeranira hamwe Abaisraeli kubooreka omugabe waabo omusya. Kwonka bakasherura Saulo yaabura. Noomanya ahabw’enki? Ahakuba akaba ayesherekire. Bwanyima ku baamushangire ahu yaabaire ari, bakamwihayo baamwemereza ahagati y’abantu. Saulo akaba naakira abantu boona aha mutwe, kandi akaba ari murungi munonga. Samueli akabagira ati: ‘Nimureebe ou Yehova atooraine.’ Abantu boona bakateera akaari nibagira bati: “Omugabe na karamaare!”

Omu kubanza Omugabe Saulo akaba ahurikiriza Samueli kandi ayorobera Yehova. Kwonka bwanyima akahinduka. Nk’eky’okureeberaho, omugabe akaba atashemereire kutamba ebitambo. Eizooba rimwe, Samueli akagambira Saulo ngu amutegyereze, kwonka Samueli akakyerererwa. Saulo akacwamu kutamba ebitambo. Mbwenu shi Samueli akakora ki? Akamugira ati: ‘Waaba otashemereire kugomera Yehova.’ Mbwenu shi Saulo akeegyera aha nshobe ye?

Bwanyima, Saulo ku yaagiire kurwana n’Abaamaleki, Samueli akamugira ngu abaite boona. Kwonka Saulo akacwamu kutaita Omugabe Agagi. Yehova akagambira Samueli ati: ‘Saulo antsigireho, kandi takimpurira.’ Samueli akagira enaku, kandi akagambira Saulo ati: ‘Ahabw’okugira ngu oyangire kworobera Yehova, naija kutoorana omugabe ondiijo.’ Samueli ku yaahindukire kugyenda, Saulo akakwata ekijwaro kya Samueli kyataguka. Samueli akagira Saulo ati: ‘Yehova akwakire obugabe.’ Yehova akaba naaza kuha obugabe ondiijo orikumukunda kandi akamworobera.