Ekitebyo 73

Omugabe Murungi wa Israeli ow’Aha Muheru

YOSIA aine emyaka munaana yonka obu ahinduka omugabe w’obugabe bwa Israeli obw’enganda ibiri obw’omu mashuuma. Egi n’emyaka mito munonga ey’omuntu kuba omugabe. N’ahabw’ekyo omu kubanza abantu bakuru nibahwera okutegyeka eihanga.

Yosia ku amara emyaka mushanju ari omugabe, atandika kusherura Yehova. Akuratira eky’okureberaho ky’abagabe barungi nka Daudi, Yehoshafaati na Hezekia. Obwo, kandi akiri omu omutsigazi, Yosia akora ekintu ky’obumanzi.

Okumara obwire buraingwa Abaisraeli baingi batwire bari babi. Nibaramya baaruhanga b’ebishuba. Nibainamira ebishushani. N’ahabw’ekyo Yosia agyenda n’abashaija be batandika kwiha okuramya okw’ebishuba omuri egyo nsi. Ogu n’omurimo muhango ahakuba abantu baingi nibaramya baaruhanga b’ebishuba. Noobaasa kureeba Yosia aho hamwe n’abashaija be barikwatagura ebishushani.

Bwanyima, Yosia aha abashaija bashatu obushoboorozi bw’okugarura busya hekalu ya Yehova. Esente nizishorozibwa kuruga omu bantu kandi ziheebwa aba bashaija kushashura ahabw’omurimo ogurikuza kukorwa. Ku baba nibakora ahari hekalu, omunyamurwa omukuru Hilukia azoora omwo ekintu kikuru munonga. Kikaba kiri ekitabo kyenyine eky’amateeka eki Yehova yaaragiire Musa kuhandiika, ira munonga. Kikaba kibuzire kumara emyaka mingi.

Ekitabo ekyo bakitwarira Yosia, atyo ashaba ngu bakimushomere. Omu kuhurikiza, Yosia hati areeba ngu abantu batwire batarikukuratira amateeka ga Yehova. Ashaasha ahabw’eki, kandi n’ahabw’ekyo atagura ebijwaro bye nk’oku orikureeba aha omu kishushani. Agira ati: ‘Yehova atwiniire ekiniga, ahabw’okuba baatataitwe tibarakuratiire biragiro ebihandiikirwe omu kitabo eki.’

Yosia aragiira Hilukia omunyamurwa omukuru okwebuuza ahari Yehova eki arikuza kubakora. Hilukia aza owa Hulida, omurangikazi, kandi amubuuza. Omurangikazi aheereza obutumwa obu kuruga ahari Yehova kubutwarira Yosia: ‘Yerusaalemu hamwe n’abantu boona nibaija kubonerezibwa ahakuba baramize baaruhanga b’ebishuba kandi ensi bagiijwize obubi. Kwonka ahabwawe iwe, Yosia, okozire ebirungi, okubonereza oku tikuriija okuhitsya obu orifa.’

2 Obusingye 34:1-28.