Yosia Akaba Naakunda Ebiragiro bya Ruhanga

Yosia akaba omugabe wa Yuda obu yaabaire aine emyaka munaana. Omu bwire obwo, abantu bakaba nibakora eby’obufumu kandi nibaramya ebishushani. Yosia ku yaahikize emyaka 16, akateeraho kwega oku arikubaasa kuramya Yehova omu muringo oguhikire. Ku yaahikize emyaka 20, akatandika kucwekyereza ebishushani n’amatambiro omu ihanga ryona. Yosia ku yaahikize emyaka 26, akataho entebeekanisa y’okuhunduuza hekalu ya Yehova.

Omunyamurwa omukuru Hilukia, akashanga omu hekalu omuzingo gw’Ebiragiro bya Yehova, nigubaasa kuba gwabaire guri omuzingo ogwahandiikirwe Musa. Shafani omuhandiiki w’omugabe akareetera Yosia omuzingo kandi yaatandika kushoma Ebiragiro omu iraka eririkuhurirwa. Yosia ku yaahurikiize, akeetegyereza ngu abantu batwire nibagomera Yehova kumara emyaka mingi. Omugabe Yosia akagambira Hilukia ati: ‘Yehova atugirire ekiniga kingi. Gyenda ogambe nawe. Yehova naija kutugambira eki twine kukora.’ Kurabira omuri nabikazi Hulida, Yehova akagarukamu ati: ‘Abantu ba Yuda baantsingireho. Nibaija kufubirwa kwonka butari mu bwire bw’omugabe Yosia, ahakuba ayecureerize.’

Omugabe Yosia ku yaahurire obutumwa, akaza omu hekalu kandi yaayeta abantu ba Yuda kweteeranira hamwe. Akashomera ihanga ryona Ebiragiro bya Yehova. Yosia n’abantu boona bakaraganisa kworobera Yehova baihire aha mutima.

Eihanga rya Yuda rikaba rimazire emyaka mingi ritarikugira obugyenyi bw’Okuhingurwaho. Kwonka Yosia ku yaashomire omu Biragiro ngu baine kukora obugyenyi bw’Okuhingurwaho buri mwaka, akagambira ihanga eryo ati: ‘Nitwija kukorera Yehova obugyenyi bw’Okuhingurwaho.’ Bwanyima Yosia akatebeekanisa kuhayo ebitambo kandi yaataho n’abeeshongozi aha hekalu. Eihanga ryona rikakora obugyenyi bw’Okuhingurwaho bwanyima baakora n’Obugyenyi bw’Emigaati Etatumbisiibwe, obwamazire ebiro mushanju. Okuruga omu bwire bwa Samueli hakaba hatakabahoga obugyenyi bw’Okuhingurwaho nk’obwo. Yosia akaba naakunda Ebiragiro bya Ruhanga. Nookunda kwega ebirikukwata ahari Yehova?