Ekitebyo 115

Ekibanja kya Ruhanga Ekisya omu Nsi

REEBA egyo miti miraingwa, ebimuri birungi hamwe n’enshozi ndaingwa. Aha tiharungi munonga? Reeba oku engabi erikuriira omu ngaro z’omwojo. Kandi reeba entare n’embaraasi ebyemereire kuriya omu bunyaatsi. Tokaakunzire kutuura omu nju eri omu mwanya nk’ogu?

Ruhanga nakwendeza kutuura omu kibanja kye omu nsi ebiro byona. Tarikukwendeza kugira obusaasi oburi omu bantu ebiro ebi. Oku n’okuraganisa kwa Baibuli ahari abo abarituura omu nsi ensya: ‘Ruhanga aryatuura nabo. Tiharibaho kufa bundi nari okurira nari obusaasi. Ebya ira biryaba bihweireho.’

Yesu naija kuhamya ngu empindahinduka egi ey’okutangaaza yaabaho. Noomanya ni ryari? Eego, ni yaaheza kwiha obubi bwona omu nsi hamwe n’abantu ababi. Ijuka, Yesu obu yaabaire ari omu nsi akatambira abantu endwara zoona eza buri muringo, kandi yaazoora n’abafu. Yesu akakora eki okworeka ebi arikora omu nsi yoona ku ariba Omugabe omu bukama bwa Ruhanga.

Teekateeka oku ekibanja kya Ruhanga kiriba nikishemeza! Yesu hamwe n’abo abu atooraine, baryaija kuba nibategyekyera omu iguru. Abategyeki aba baryareeberera buri omwe omu nsi kandi bareebe ngu baashemererwa. Reka tureebe eki tushe- mereire kukora okubaasa kuhamya ngu Ruhanga naija kutuha amagara agatahwaho omu kibanja kye ekisya.

Okushuuruurwa 21:3, 4; 5:9, 10; 14:1-3.