Baadaimoni Nibashendashenda Abantu Kugomera Ruhanga
Beitu ahabw’enki Sitaane na baadaimoni be nibakora munonga kubeiha abantu? N’ahabw’okuba nibenda ngu tubegaiteho omu bugomi bwabo. Nibenda ngu tubaramye. Kandi nibenda ngu twikirize ebishuba byabo kandi ngu twemanyiize kukora ebintu ebi Yehova arikwanga. Bingi aha bikorwa ebi nibitwariramu emigyenzo erikukwata aha bafu.
Okufa kw’omukundwa nikureeta obusaasi bwingi, n’ekya butoosha kandi ti kibi okuganya. Na Yesu ‘akarira’ bwanyima y’okufa kwa munywani we Laazaaro.—Yohaana 11:35.
Omu nsi yoona, harimu emigyenzo mingi erikukwata aha kufa, kandi emingi terikuhakanisa mitindo ya Baibuli. Bimwe ebirikukorwa omu migyenzo emwe byegami aha nteekateeka erikugira ngu abafu nibabaasa kureeba abahuriire. Okuraara aha muriro, okucura okurengyesereize, hamwe n’emigyenzo erikubaho aha kuziika yoona neekorwa ahabw’okutiina kubiihiza emyoyo y’abafu. Kwonka obu abafiire ‘batagira ki bamanya,’ abo abarikukora emigyenzo nk’egyo nibaba nibashemba ebishuba bya Sitaane.—Omubuurizi 9:5.
Emigyenzo nari emikoro endiijo neeruga omu nyikiriza erikugira ngu abafu nibetenga obuhwezi kuruga aha bahuriire kandi ngu nibabaasa kubasaasa baaba batabashemeize. Omu mahanga agamwe, bwanyima y’omuntu kufa, nihabaho obugyenyi n’okuhayo ebitambo kumara ebiro 40 nari omwaka. Ebi nibiteekateekwaho kuhwera omufu omu ‘kwambuka’ kuza omu butuuro bw’emyoyo. Ekindi ekirikukira kukorwa n’okuheereza abafu eby’okurya n’eby’okunywa.
Emigyenzo egi yoona tehikire ahabw’okuba neeshemba ebishuba bya Sitaane ebirikukwata aha bafu. Noogira ngu Yehova naija kutushemerererwa twagira eki twakora ekiine akakwate n’emigyenzo erikuruga omu nyegyesa ya baadaimoni? Tarikubaasa kutushemerererwa!—2 Abakorinso 6:14-18.
Omu miringo yoona, abaheereza ba Ruhanga ow’amazima tibarikwejumba omu bikorwa ebirikushemba ebishuba bya Sitaane. Omu mwanya gw’ekyo, na rukundo nibata omutima aha kuhwera abahuriire kandi babahuumuriza. Nibamanya ngu buzima omuntu ku arikuheza kufa, Yehova niwe wenka orikubaasa kumuhwera.—Yobu 14:14, 15.
Ruhanga Naayanga eby’Obufumu
Abantu abamwe nibekorenganira na baadaimoni nari barabira omu bafumu. Eki nikyetwa okuraguza. Oburogi, okuragura ebiribaho, n’okubuuza abafu byona n’emiringo y’obufumu.
Baibuli neejumiirira ebintu ebi, erikugira eti: “Hatarigira omuntu weena omuriimwe . . . owaaba omufumu, nari orikuragura ebiribaho, nari omuteezi w’ebyatsi, nari omucecezi, nari omuhi w’engisha, nari orikubandwa emizimu, nari omurogi, nari orikubuuza abafu. Ahakuba orikukora ebyo weena n’ekirikunugwa ahari MUKAMA.”—Eky’Ebiragiro 18:10-12.
Ahabw’enki Yehova naaturabura munonga aha bikorwa ebi?
Ahabw’oburungi bwaitu, Yehova naaturabura kwetantarira kimwe emiringo y’obufumu yoona. Naakunda abantu kandi abafaho, naamanya ngu abo abarikukwatanisa na baadaimoni nibaba boorekyeire okubonabona.
Omwe aha bantu nk’abo ni Nilda, owaabaire ari omufumu omuri Brazil. Baadaimoni bakamubonabonesa munonga. Naashoborora ati: “Baadaimoni . . . bakaba bantaahamu, bandagiira. Obumwe bakaba bambuza obwengye, mba nk’omutabuki w’omutwe. Baadaimoni bakaampiganisa munonga n’emitsi yangye yaahika n’aha kurwara. Nkaba mmira emibazi erikugwejegyeza kandi nkatandika kunywa ebirikusinza n’okureesa ntarikureka. Ebi bikaguma nibimbaho kumara emyaka mingi.”
Bwanyima, aine obuhwezi bwa Yehova n’Abajurizi be ab’omu nsi, Nilda akeecwa ahari baadaimoni kandi hati aine amagara marungi againe ekigyendererwa. Naagira ati: “Niinyehanangiriza buri muntu weena okutagyezaho omurundi na gumwe kukorengana n’emyoyo [emibi].”
[Ekishushani ekiri aha rupapura 19]
Emigyenzo emwe nekomooka aha kishuba ngu abafu nibabaasa kutureeba
[Ekishushani ekiri aha rupapura 20]
Emigyenzo endiijo nekomooka aha kishuba ngu abafu nibetenga obuhwezi bwaitu
[Ekishushani ekiri aha rupapura 21]
Ruhanga naayanga emigyenzo egi emibi. Naayenda tube niwe twaramya wenka.—Okuruga 20:5
[Ebishushani ebiri aha rupapura 22]
Abo abarikwejumba omu by’obufumu emirundi mingi nibatunga oburemeezi. Nibabaasa kufeerwa amaka gaabo, obusingye bwabo nangwa n’amagara gaabo