Eishomo 14

Omuringo ogu Abajurizi ba Yehova Batebekanisiibwemu

Abajurizi ba Yehova ab’obwiire obu bakatandika ryaari? (1)

Enteerana z’Abajurizi ba Yehova nizitwaazibwa zita? (2)

Esente eziri kukozesibwa niziruga hi? (3)

N’oha ori kutwaara obwebembezi omuri buri kibiina? (4)

Ni nteerana ki empango eziri kubaho ibara mwaaka? (5)

Ni mirimo ki eri kukorwa aha kitebe kyaabo ekikuru hamwe n’omu za offisi z’amataagi? (6)

1. Abajurizi ba Yehova ab’obwiire obu bakatandika omu myaaka nk’eya 1870. Okubanza bakaba nibeetwa Abeegi ba Baiburi. Kwonka omu gwa 1931 bakatunga eiziina, Abajurizi ba Yehova okuruga omu Byahandiikirwe. (Isaaya 43:10) Okuruga aha kutandika kukye ekibiina kikuzire, n’obwahati kirimu Abajurizi obukaikuru n’obukaikuru abari kubuurira omu mahanga gari kukira ahari 230.

2. Ebibiina ebiri kukira obwingi eby’Abajurizi ba Yehova nibiteerana emirundi eshatu buri saabiiti. Naiwe noyakiirwa gye kubaho omu nteerana ezo. (Abaheburaayo 10:24; 25) Ebiri kwegyesibwa nibiruga omu Baiburi. Enteerana nizitandika kandi zihendera n’okushaba. “Ebyeshongoro eby’omwoyo” ebiri kurugira kimwe aha mutima nibyeshongorerwa omu nteerana eziri kukira obwingi. (Abaefeso 5:18, 19) Okutaahamu n’okwa busha kandi tihariho kushorooza mpiiha.—Matayo 10:8.

3. Ebibiina ebiri kukira obwingi nibiteeranira omu Kingdom Hall. Ebi nibikira kuba ebyombeko ebya buriijo ebiri kwombekwa Abajurizi abekundiire. Tori kwiija kureebamu bishushani biri kuramibwa, emisharaba nari ebiri kushushana nk’ebyo omu Kingdom Hall. Empiiha eziri kukozesibwa niziruga omu kuheereza okw’abekundiire oyekundiire. Ahari abo abari kwenda kugira eki baheerezayo, hariho akashandukye akari kurundanirwamu.—2 Abakorinso 9:7.

4. Omuri ibara kibiina harimu abakuru nari abareeberezi. Nibo bari kutwaara obwebembezi omu kweegyesa omu kibiina. (1 Timoseo 3:1-7; 5:17) Nibahwerwaho abaheereza. (1 Timoseo 3:8-10, 12, 13) Abashaija aba tibari kutwaarwa nk’abari kukira abandi omu kibiina. (2 Abakorinso 1:24) Tibari kuheebwa bitiinisa by’omutaano. (Matayo 23:8-10) Emijwarire yaabo teine mutaano ney’abandi. Tibari kushashurwa mushaara. Abakuru nibata omutima aha byetengo by’ekibiina eby’omwoyo, hatariho kugyemwa kwoona. Nibahumuza kandi baha obuhabuzi omu bwiire bw’obusaasi.—Yakobo 5:14-16; 1 Petero 5:2, 3.

5. Abajurizi ba Yehova kandi nibagira enteerana empango ibara mwaaka. Omu bwiire obwo ebibiina bingi nibyeteerana hamwe bitunga programu ey’omutaano okwegyesezibwamu Baiburi. Okubatizibwa kw’abeegi abasya nikubaho omuri ibara ruteerana oruhango.—Matayo 3:13-17; 28:19, 20.

6. Ekitebe ekikuru eky’Abajurizi ba Yehova omu nsi yoona kiri omu New York. Okwo niyo hari Akakiiko Akareeberezi, ekibiina ekikuru eky’abakuru abaine okwetegyeereza, abari kureeberera ekibiina omu nsi yoona. Kandi hariho offisi z’amataagi eziri kukira omuri 100 okwehinguriza ensi yoona. Omu myaaka egi abekundiire nibahweera omu kuteera n’okwohereza ebitabo, ebiri kushoboorora Baiburi. Obuhabuzi oburi kukwaata aha kutebeekanisa omurimo gw’okubuurira nabwo nibuheebwa. Ahabw’enki otari kutebeekanisa kutayaayira offisi y’eitaagi ekuri haihi?