Ahabw’Enki Ruhanga Aine Abantu Abatebeekanisiibwe Gye?

1. Ahabw’enki Ruhanga yaatooraine Abaisraeli?

Ruhanga akatoorana baijukuru ba Abrahamu, yaabakoramu eihanga yaabaha n’ebiragiro. Eihanga eryo akaryeta “Israeli”, yaarihwera kuramya omu muringo oguhikire kandi yaariha n’ekigambo kye. (Zaaburi 147:19, 20) N’ahabw’ekyo ab’amahanga agandi bakaatungire emigisha ahabw’Abaisraeli.​—Shoma Okutandika 22:18.

Ruhanga akatoorana Abaisraeli kuba abajurizi be. Ebyafaayo byabo nibyoreka oku abantu barikugasirwa baayorobera ebiragiro bya Ruhanga. (Eky’Ebiragiro 4:6) N’ahabw’ekyo, abandi ku baakureebire Abaisraeli kandi bakabeegyeraho, bakaamanyire Ruhanga.​—Shoma Isaaya 43:10, 12.

2. Ahabw’enki Abakristaayo ab’amazima batebeekanisiibwe gye?

Bwanyima, Ruhanga akatoorana ekibiina Ekikristaayo kuza omu mwanya gw’eihanga rya Israeli, ahakuba akaba atakirisiima. (Matayo 21:43; 23:37, 38) Hati, Abakristaayo ab’amazima nibo bari omu mwanya gw’Abaisraeli nk’abajurizi ba Yehova.​—Shoma Ebyakozirwe 15:14, 17.

Yesu akatebeekanisa abakuratsi be kubuurira n’okuhindura abantu abeegi omu mahanga goona. (Matayo 10:7, 11; 24:14; 28:19, 20) Hati omurimo ogu guri haihi kuhendera omu biro ebi eby’emperu. Yehova areetsire abantu baingi omu kuramya okw’amazima kuruga omu mahanga goona. (Okushuuruurwa 7:9, 10) Abakristaayo ab’amazima baine obumwe, nibagaruranamu amaani kandi nibahwerahwerana. Omu nsi yoona, omu nteerane zaabo nibeega ebirikushushana kuruga omu Baibuli.​—Shoma Abaheburaayo 10:24, 25.

3. Ekibiina ky’Abajurizi ba Yehova eky’omu bunaku obu, kikatandika kita?

Ekibiina ky’Abajurizi ba Yehova eky’omu bunaku obu kikatandika omu myaka ya 1870. Abeegi ba Baibuli bakye bakatandika kugaruka kuzoora amazima g’omu Baibuli. Bakaba nibamanya ngu Yesu akaba atebeekaniise ekibiina Ekikristaayo kubuurira, n’ahabw’ekyo bakatandika kubuurira aha Bukama omu nsi yoona. Omuri 1931 bakeetwa Abajurizi ba Yehova.​—Shoma Ebyakozirwe 1:8; 2:1, 4; 5:42.

4. Abajurizi ba Yehova batebeekanisiibwe bata?

Omu kyasha ky’okubanza, ab’omu kibiina Ekikristaayo omu nsi yoona bakaba nibagasirwa omu kakiiko akareeberezi. Ab’akakiiko ako bakaba nibaikiriza Yesu nk’omutwe gw’ekibiina. (Ebyakozirwe 16:4, 5) N’omu bunaku obu, Abajurizi ba Yehova omu nsi yoona nibagasirwa omu Kakiiko Akareeberezi. Akakiiko aka nikareeberera ofiisi z’amataagi ez’Abajurizi ba Yehova ezirikukora aha by’okuvunuura, okuteera n’okugaba ebitabo ebirikukoresibwa kwegyesa abantu Baibuli, omu ndiimi ezirikurenga 600. N’ahabw’ekyo Akakiiko Akareeberezi nikaha ebibiina ebirikurenga 100,000 obuhabuzi kuruga omu Baibuli. Omu buri kibiina, abashaija abarikuhikiiriza ebirikwetengyesa nibaheereza nk’abareeberezi. Abashaija aba nibareeberera obusyo bwa Ruhanga.​—Shoma 1 Petero 5:2, 3.

Abajurizi ba Yehova batebeekanisiibwe kubuurira amakuru marungi n’okuhindura abantu abeegi. Nitubuurira enju aha nju nk’oku entumwa zaakozire. (Ebyakozirwe 20:20) Kandi nitushaba abarikukunda amazima kubeegyesa Baibuli. Abajurizi ba Yehova ti kibiina kwonka, kureka n’eka emwe kandi twine Tataitwe oine rukundo. Turi ab’eishe-emwe abarikukundana. (2 Abatesalonika 1:3) Ahabw’okugira ngu abantu ba Yehova batebeekanisiibwe kukora ebi Ruhanga akunda n’okuhwera abandi, omu nsi nibo barikukirayo kugira okushemererwa.​—Shoma Zaaburi 33:12; Ebyakozirwe 20:35.