Obugyenyi Bwona Nibushemeza Ruhanga?

NOOKUNDA kuza aha bugyenyi?— Nibubaasa kubamu okushemererwa kwingi. Nooteekateeka ngu Omwegyesa Mukuru akaayenzire ngu tuze aha bugyenyi?— We akaza aha bugyenyi bw’omuntu omwe owaabaire naashwera kandi bamwe aha beegi be bakagyenda nawe. Yehova ni ‘Ruhanga w’okushemererwa,’ n’ahabw’ekyo nikimushemeza twaza aha bugyenyi obushemeire.​—1 Timoseo 1:11; Yohaana 2:1-11.

Aha rupapura 29 orw’ekitabo eki nihagira ngu Yehova akabaganisamu Enyanja Erikutukura kugira ngu Abaisraeli barabemu. Noijuka ekyo orikukishomaho omu kitabo eki?— Bwanyima, abantu bakeeshongora, baazina kandi baahimbisa Yehova. Bukaba buri nk’obugyenyi. Abantu bakaba bashemereirwe, kandi nitubaasa kuhamya ngu Ruhanga nawe akaba ashemereirwe.​—Okuruga 15:1, 20, 21.

Bwanyima y’emyaka nka 40, Abaisraeli bakagaruka baaza aha bundi bugyenyi buhango. Aha murundi ogu abantu abaabesire bakaba batarikuramya Yehova. Buzima, abantu abaabesire bakaba nibaramya baaruhanga abandi kandi bakaba nibakira kuteerana n’abantu abu batari nabo mu bushwere. Nooteekateeka ngu kikaba kihikire kuza aha bugyenyi nk’obwo?— Buzima ekyo tikiraashemeize Yehova kandi akafubira Abaisraeli.​—Okubara 25:1-9; 1 Abakorinso 10:8.

Baibuli kandi neegamba aha bugyenyi bubiri bw’okukuza amazaarwa. Mbwenu shi bumwe aharibwo bukaba buri obw’okukuza amazaarwa g’Omwegyesa Mukuru?— Ngaaha. Obugyenyi obwo bwombi bukaba buri obw’okukuza amazaarwa g’abashaija abaabaire batarikuheereza Yehova. Obumwe bukaba buri obw’Omugabe Heroode Antipasi. Akaba ari omutegyeki wa disiturikiti ya Garilaaya obu Yesu yaabaire naatuurayo.

Omugabe Heroode akakora ebintu bingi bibi. Akatwara muka mwene ishe. Omukazi ogwo akaba naayetwa Herodia. Omuheereza wa Ruhanga, Yohaana Omubatizi akagambira Heroode ngu kikaba kitahikire kukora ekyo. Heroode tarakunzire eki Yohaana yaamugambiire. N’ahabw’ekyo akaragiira ngu Yohaana ateebwe omu kihome.​—Luka 3:19, 20.

Obu Yohaana yaabaire ari omu kihome, obwire bukahika obw’okukuza amazaarwa ga Heroode. Heroode akakora obugyenyi buhango yaayeta abantu b’ebitiinisa baingi. Boona bakarya, baanywa viinyo kandi baashemererwa. Bwanyima muhara wa Herodia akaija yaabazinira. Buri omwe akashemererwa ahabw’oku yaazinire kandi Omugabe Heroode yaayenda kumuha ekiconco. Akagira omwishiki ogwo ati: “Kyona kyona eki oranshabe, ninkikuha, n’obu kyakuba ekicweka ky’obugabe bwangye.”

Akaba naija kushaba ki? Noogira ngu akaba naija kushaba esente, emyenda mirungi, nari ekikaari ekye ahabwe? Omwishiki akaba atarikumanya eki araashabe. N’ahabw’ekyo, akagyenda yaabuuza nyina Herodia ati: “Okaayenzire ngu mmushabe ki?”

Ijuka ngu Herodia akaba naayangira kimwe Yohaana Omubatizi. N’ahabw’ekyo akagambira omuhara kushaba omutwe gwa Yohaana. Omwishiki akagarukayo aha mugabe kandi yaamugira ati: “Niinyenda hati mbwenu ompe omutwe gwa Yohaana Omubatizi omu rucuba.”

Omugabe Heroode akaba atarikwenda kwita Yohaana ahakuba akaba naamanya ngu Yohaana akaba ari omushaija murungi. Kwonka Heroode akaba yaaheza kuragaanisa, kandi akatiina eki abaabaire bari aha bugyenyi obwo baakuteekateekire yaahindura aha ki yaaragaanisa. N’ahabw’ekyo akoohereza omushaija omu kihome kutemaho Yohaana omutwe. Ahonaaho omushaija akagaruka aine omutwe gwa Yohaana aha rucuba, yaaguha omwishiki. Omwishiki nawe yaaguha nyina.​—Mako 6:17-29.

Obundi obugyenyi bw’okukuza amazaarwa obu Baibuli erikutugambira nabwo bukaba butari burungi. Bukaba buri obw’omugabe wa Misri. Aha bugyenyi obwo nabwo, omugabe akaragiira ngu baatemaho omuntu omutwe. Bwanyima y’ekyo, akahanika omuntu ogwo ngu ebinyonyi bimurye! (Okutandika 40:19-22) Nooteekateeka ngu Ruhanga akasiima obugyenyi obwo bwombi?— Iwe okaayenzire kuba aha bugyenyi nk’obwo?—

Nitumanya ngu buri kintu kyona ekihandiikirwe omuri Baibuli kirimu ahabw’ekigyendererwa. Neegamba aha bugyenyi obw’okukuza amazaarwa bubiri bwonka. Kandi aha bugyenyi obwo bwombi, hakakorerwaho ebintu bibi. Mbwenu nooteekateeka ngu Ruhanga naatugambira ki aha bikwatiraine n’obugyenyi bw’okukuza ebiro by’amazaarwa? Ruhanga naayenda ngu tukuze ebiro by’amazaarwa?—

N’amazima ngu aha bugyenyi nk’obwo hati, abantu tibarikutemaho omuntu omutwe. Kwonka okukuza ebiro by’amazaarwa, kukatandikwaho abantu abaabaire batarikuramya Ruhanga ow’amazima. Ekitabo ekirikwetwa The Catholic Encyclopedia nikigamba aha kukuza ebiro by’amazaarwa okurikugambwaho omu Baibuli kiti: “Abasiisi bonka . . . nibo barikukora obugyenyi kushemererwa ahabw’ebiro ebi baazaariirweho.” Mbwenu shi nitwenda kuba nkabo?—

Kandi shi Omwegyesa Mukuru? Noogira ngu akakuza ebiro by’amazaarwa ge?— Ngaaha, Baibuli tihaine eki erikugamba aha kukuza amazaarwa ga Yesu. Nangwa n’abakuratsi ba Yesu aba ira tibarakurize amazaarwa ge. Noomanya ahabw’enki bwanyima abantu baacwiremu kukuza amazaarwa ga Yesu omu kwa Ikumi n’Abiri 25?—

Ekiro ekyo kikatooranwa ahabw’okuba nk’oku ekitabo The World Book Encyclopedia kirikugamba, “abantu ba Rooma bakaba batwire nibakikuza nk’obugyenyi bwa Saturn ruhanga w’eby’obuhingi, barikushemererwa ahabw’okureebeka kw’izooba.” N’ahabw’ekyo abantu bakacwamu kukuza ebiro by’amazaarwa ga Yesu aha kiro eki abakaafiire baabaire nibakurizaho ekiro kikuru ekyo!

Noomanya enshonga ahabw’enki Yesu atarikubaasa kuba yaazairwe omu kwa Ikumi n’Abiri?— Ahabw’okuba Baibuli neegira ngu obu Yesu yaazaarwa, abariisa b’entaama bakaba bakiri aheeru bariisize nyekiro. (Luka 2:8-12) Kandi tibaakubaire bari aheeru bariisize omu kwa Ikumi n’Abiri okurimu obutiti n’enjura nyingi omu nsi ei Yesu yaazaariirwemu.

Abantu baingi nibamanya ngu Yesu tarazairwe aha izooba rya Noiri. Kandi nibamanya ngu aha izooba eryo abakaafiire bakaba nibakoreraho obugyenyi obutarikushemeza Ruhanga. Kwonka baingi nibakuza Noiri. Nibata omutima munonga aha kweshemeza okukira aha kumanya eki Ruhanga arikukigambaho. Kwonka nitwenda kushemeza Yehova, tikwo?—

N’ahabw’ekyo twaza kugira obugyenyi, twine kuhamya ngu Yehova naabusiima. Nitubaasa kubugira obwire bwona obu turikwenda omu mwaka. Titwine kutegyereza kubugira aha izooba ry’omutaano. Nitubaasa kurya eby’okurya by’omutaano kandi tushemererwe turikuzaana emizaano. Okaayenzire kuba nikyo waakora?— Obundi noobaasa kukigambaho n’abazaire baawe reero bakuhwere kutebeekanisa kukora obugyenyi. Ekyo nikibaasa kuba kirungi, tikwo?— Kwonka otakatebeekaniise kugira obugyenyi, oine kuhamya ngu Ruhanga naija kubusiima.