Ahabw’enki Abajurizi ba Yehova Batarikukuza Ebiro by’Okuzaarwa?

Abajurizi ba Yehova tibarikukuza ebiro by’okuzaarwa ahakuba nitumanya ngu okukuza ebiro nk’ebyo tikirikushemeza Ruhanga. N’obu Baibuli eraabe etarikuzibira butunu okukuza ebiro by’okuzaarwa, neetuhwera kumanya enshonga nkuru ezirikukwata aha biro ebi, n’okwetegyereza oku Ruhanga arikubireeba. Yetegyereze ina aha nshonga ezi n’emisingye ya Baibuli erikuhikaana nazo.

1. Okukuza ebiro by’okuzaarwa nikukomooka omu bukafiire. Kurugiirira aha kitabo Funk & Wagnalls Standard Dictionary of Folklore, Mythology, and Legend, okukuza ebiro by’okuzaarwa kukakomooka omu nyikiriza ngu aha izooba ry’okuzaarwa kw’omuntu, “emyoyo mibi neebaasa kutaahirira abari aha mukoro ogwo” kandi ngu “okubaho kw’abanywani n’okwendezana emigisha nikibaasa kubarinda.” Ekitabo The Lore of Birthdays nikigira ngu ira, ebihandiiko ebirikukwata aha kuzaarwa kw’omuntu bikaba biri “bikuru omu kubinga omugisha mubi” kurugiirira “aha barikuraguza enyonyoozi.” Ekitabo eki nikyongyeraho ngu “kanduro z’okukuza ebiro by’okuzaarwa, zirimu omuguruko omu kwendeza omuntu emigisha.”

   Kwonka Baibuli neegira ngu okukoresa emiguruko, oburogi, n’obufumu, nari “n’ebindi nk’ebyo” kigwire. (Eky’Ebiragiro 18:14; Abagalatia 5:19-21) Nangwa, enshonga emwe ahabw’enki Ruhanga yaagwerairwe kubi Babulooni orurembo rwa ira, n’ahabw’okugira ngu abatuuzi barwo bakaba nibaraguza enyonyoozi, gumwe aha muringo gw’obufumu. (Isaaya 47:11-15) Abajurizi ba Yehova tibarikusheruriza buri bukomooko bw’omugyenzo, kwonka Ebyahandiikirwe byaba nibigamba aha nshonga nk’ezo, titurikuzeehuzya.

2. Abakristaayo aba ira bakaba batarikukuza ebiro by’okuzaarwa. Ekitabo The World Book Encyclopedia nikigira ngu “bakaba nibareeba okukuza okuzaarwa kw’omuntu nk’omugyenzo gw’ekikaafiire.” Baibuli neeyoreka ngu entumwa n’abandi abaayegyesiibwe Yesu butunu bakateeraho Abakristaayo boona omusingi gw’okukuratira.—2 Abatesalonika 3:6.

3. Omukoro gwonka ogu Abakristaayo baine kukuza nigukwata aha kufa kwa Yesu beitu kutari kuzaarwa kwe. (Luka 22:17-20) Eki tikishemereire kukutangaaza, ahakuba Baibuli neegira ngu “eizooba ery’okufeeraho nirikira ery’okuzaarirwaho.” (Omubuurizi 7:1) Yesu arikuza kuhika aha kufa, akaba akozire eiziina rirungi na Ruhanga, ekyareeteire eizooba rye ery’okufa kuba rikuru munonga kukira eizooba rye ery’okuzaarwa kwe.—Abaheburaayo 1:4..

4. Baibuli terikworeka ngu hariho omuheereza wa Ruhanga owaakurize okuzaarwa kwe. Oku tikwenda kuba abeegyendesereza kyonka, kureka Baibuli neegamba aha kukuza ebiro by’okuzaarwa eby’abantu babiri bonka abaabaire batarikuheereza Ruhanga. Kwonka, aha mikoro egi yombi, hakakorerwaho ebintu bibi munonga.—Okutandika 40:20-22; Mako 6:21-29.

Abaana b’Abajurizi ba Yehova shi nibeehurira haine eki barikufeerwa ahabw’okutakuza ebiro by’okuzaarwa?

Abajurizi ba Yehova nibakunda abaana baabo omu mwaka gwona nk’abandi bazaire, otwariiremu okubaha ebiconco n’okugira emikoro y’okushemererwa. Nibateeraho kutooreza Ruhanga ohikiriire, orikuha abaana be ebintu birungi. (Matayo 7:11) Abaana b’Abajurizi ba Yehova tibarikuhurira baine eki barikufeerwa, nk’oku ebi bamwe baagambire ebiri ahaifo birikworeka:

• “Ni kishemeza munonga kutunga ekiconco obu orikuba otarikuteekateeka kukitunga.”—Tammy, ow’emyaka 12..

• “N’obu ndaabe ntarikutunga ebiconco aha izooba ry’okuzaarwa kwangye, nabwo abazaire bangye nibangurira ebiconco aha mazooba agandi Eki nikinshemeza nimba ntarikuteekateeka ngu nikiza kubaho.”—Gregory, ow’emyaka 11.

• “Nooteekateeka ngu edakiika ikumi, twakeeki, n’ekyeshongoro ogwo n’omukoro? Oine kwija omuka owaitu okareeba oku omukoro ogwa buzima gurikushusha!”—Eric, ow’emyaka 6..