Akakiiko Akareeberezi ak’Abajurizi ba Yehova Niki?

Akakiiko Akareeberezi ni guruupu y’Abakristaayo bakye abarikuha Abajurizi ba Yehova eby’okukuratira omu nsi yoona. Baine obujunaanizibwa bw’emiringo ebiri:

• Nibareeberera omurimo gw’okutaho obuhabuzi oburikwegamira ahari Baibuli oburikwizira omu bitabo, enteerane, n’amashomero g’Abajurizi ba Yehova.—Luka 12:42.

• Nibareeberera omurimo gw’Abajurizi ba Yehova ogurikukorwa omu nsi yoona barikutuhabura oku turaahikiirize obuheereza bw’orweteeraine, kandi nibareeberera n’oku ebirikuheebwayo birikukoresibwa.

Akakiiko Akareeberezi nikatooreza ’entumwa n’abareeberezi omuri Yerusaalemu’ abaabaire nibacwamu aha nshonga nkuru ahabw’ekibiina Ekikristaayo kyona, omu kyasha ky’okubanza. (Ebyakozirwe 15:2) Akakiiko Akareeberezi kushushana n’abashaija abo abeesigwa, ti beebembezi b’ekibiina kyaitu. Nibasherura obuhabuzi omu Baibuli, nibamanya ngu Yehova akatoorana Yesu Kristo kuba niwe yaaba Omutwe gw’ekibiina.—1 Abakorinso 11:3; Abaefeso 5:23.

Ni baahi abari aha Kakiiko Akareeberezi?

Hariho Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, na Jeffrey Winder. Nibaheereza aha ofiisi yaitu enkuru omuri Warwick, New York, U.S.A.

Akakiiko Akareeberezi katebeekanisiibwe kata?

Akakiiko Akareeberezi kataireho obundi obukiiko mukaaga kureeberera ebirikukwata aha murimo gwaitu, kandi buri w’Akakiiko Akareebrezi naaheereza aha kakiiko kamwe nari n’okukiraho.

• Akakiiko Akahikaanisa: Nikareeberera enshonga z’eby’ebiragiro, kairukangirira abahikirweho ebihikiirizi, kakora aha nshonga z’Abajurizi ba Yehova abarikuba nibahiiganisibwa ahabw’enyikiriza zaabo z’ediini, n’enshonga nkuru ezindi ezirikukwata aha Bajurizi ba Yehova.

• Akakiiko k’Enshonga z’Ababeseeli : Nikareeberera entebeekanisa z’Ababeseeli.

• Akakiiko k’Okuteera Ebitabo n’Okwombeka: Nikareeberera okushohoza ebitabo n’okubyohereza omu bibiina, okwombeka Ebyombeko by’Obukama, ofiisi z’abavunuuzi, na ofiisi z’amataagi.

• Akakiiko k’Obuheereza: Nikareeberera omurimo gw’okubuurira amakuru marungi g’Obukama.—Matayo 24:14.

• Akakiiko k’Okwegyesa: Nikareeberera omurimo gw’okutebeekanisa enteerane, amashomero, n’amaraka na vidiyo.

• Akakiiko Akahandiiki: Nikareeberera omurimo bw’okutebeekanisa obuhabuzi bw’eby’omwoyo obuhandiikirwe omu bitabo, oburi aha mukura, kandi nikareeberera n’omurimo gw’okuvunuura.

Akakiiko Akareeberezi kwongyera aha mirimo ei karikukora kurabira omu bukiiko obu mukaaga, nikagira enkiiko buri saabiiti kushwijuma ebyetengo by’ekibiina omu nsi yoona. Omu nkiiko ezi, nibeetegyereza eki Baibuli erikugamba, kandi niboorobera obuhabuzi bw’omwoyo gurikwera, reero bacwamu hamwe baikirizaine.—Ebyakozirwe 15:25.

Abahwezi b’Akakiiko Akareeberezi ni Baahi?

Aba n’Abakristaayo abeesigwa abarikuhwera aha bukiiko bw’Akakiiko Akareeberezi. (1 Abakorinso 4:2) Baine okubaasa n’okumanya omu kureeberera omurimo gw’akakiiko aku barikuba nibaheerezaho, kandi nibaza omu nkiiko z’akakiiko aku barikuba bariho buri saabiiti. N’obu baraabe tibo barikucwamu eky’aha muheru, nibahwera barikuhayo ebiteekateeko by’obwengye, nibacondooza, bata omu nkora ebi akakiiko karikuba kacwiremu, kandi nibakuratiriza kureeba ebiraarugyemu. Kandi ab’Akakiiko Akareeberezi nibabaasa kubashaba kutaayaayira ab’eishe-emwe omu bicweka bitari bimwe na bimwe omu nsi, nari kuha embazo aha mikoro, nk’enteerane eza buri mwaka nari aha kuhendera emishomo ya Gileadi.