Ensi Ensya Okurugiirira Aha Kuraganisa Kwa Ruhanga

BAIBULI, Ekigambo kya Ruhanga ekihandiikirwe, nikituha amatsiko ku kirikugira kiti: “Nitutegyereza eiguru erisya n’ensi ensya ebituurwamu okuhikiirira nk’oku yaaraganiise.”—2 Petero 3:13.

“Eiguru erisya” nikyo ki? Baibuli nekwata- nisa eiguru n’obutegyeki. (Ebyakozirwe 7:49) “Eiguru erisya” ni gavumenti ensya erikwija kutegyeka ensi yoona. Neeyetwa “nsya” ahabw’okuba neija kuza omu mwanya gw’entekanisa y’obutegyeki eriho obwahati; kandi n’itembezo risya omu kuhikiiriza ekigyendererwa kya Ruhanga. Nibwo Bukama obu Yesu yaatwegyeise kushaba. (Matayo 6:10) Obu Ruhanga ari Oburugo bwabwo kandi obu arikutuura omu iguru, nibwetwa “obukama bw’omu iguru.”—Matayo 7:21.

“Ensi ensya” yo niki? Teri nsi nsya endiijo ahabw’okuba Baibuli neeshoborora kurungi ngu Ensi egi eryatuurwamu ebiro byona. “Ensi ensya” n’ekigombe kisya ky’abantu basya. Neija kuba eri nsya ahabw’okuba ababi nibaija kuba baaherize kumarwaho. (Enfumu 2:21, 22) Obwo abarituuraho baryatiina kandi boorobere Omuhangi kandi nibaija kugyendera aha bi arikubenza. (Zaaburi 22:27) Abantu b’amahanga goona nibakiirwa okwega ebyo ebirikwetengyesa kandi n’okugyendera ahari ebyo hati. Iwe ekyo nikyo orikukora?

Omu nsi ya Ruhanga ensya, buri omwe aryaha obutegyeki Bwe ekitiinisa. Rukundo yaawe ahari Ruhanga nekureetera okumworobera? (1 Yohaana 5:3) Okworobera ebiragiro bya Ruhanga nikureebwa butunu omu maka gaawe? aha ishomero? n’omu muringo gu orikutwazamu amagara gaawe?

Omu nsi egyo ensya, abantu baryaba bamwe omu kuramya Ruhanga ow’amazima. Iwe nooramya Omuhangi w’eiguru n’ensi? Okuramya kwawe buzimazima nikukuteerana n’abaramya bagyenzi baawe omu nsi zoona, omu nganda zoona, n’endimi zoona?—Zaaburi 86:9, 10; Isaaya 2:2-4; Zefania 3:9.

[Akabokisi aha rupapura 17]

Ruhanga Orikuraganisa Ebintu Ebi

Orikuraganisa ebintu ebi niwe Muhangi w’eiguru n’ensi ebirikureebwa. Niwe ou Yesu Kristo yaamanyiise kuba “Ruhanga omwe [wenka] ow’amazima.”—Yohaana 17:3.

Abantu abarikukira obwingi nibaramya baaruhanga abu bo bonka beekoreire. Obukaikuru n’obukaikuru bw’abantu nibainamira ebishushani ebitaine magara. Abandi nibasingiza enyikiriza eziri omu bantu ezeegami aha bintu ebitari by’omwoyo, obwengye bw’abantu ninga ebyetengo byabo ahabwabo. Hoona n’abo abarikwegambaho kuba nibakuratira Baibuli ti boona ngu nibaheereza ekitiinisa eiziina ry’ogwo ou erikworeka nka ‘Ruhanga wenka ow’amazima.’—Eky’Ebiragiro 4:35.

We wenka, Omuhangi naagira ati: “Niinye Yehova. Eryo niryo eiziina ryangye.” (Isaaya 42:5, 8, NW) Eiziina eri nirireebeka omu Baibuli emirundi erikurenga ahari 7,000 omu ndimi zaayo ez’okubanza. Yesu Kristo akeegyesa abakuratsi be okushaba bati: “Tataitwe ow’omu iguru, eiziina ryawe ryezibwe.”—Matayo 6:9.

Ruhanga ow’amazima ni muntu wa muringo ki? Naayeshobororaho kuba ari Ruhanga “ow’okusaasira n’embabazi, otarahuka kugira ekiniga oijwire embabazi n’amazima” kandi nk’ogwo otasingisiriza nakakye abarikuhenda ebiragiro bye bakigyendereire. (Okuruga 34:6, 7) Ebyafaayo aha nkorengana ye n’abantu nibihamya amazima g’ebi ebyamugambwaho.

Byombi eiziina na mukama waaryo bishemereire kwezibwa, nari okutwarwa nk’ebirikwera. Nk’Omuhangi kandi Omutegyeki wa Byona, ashemereire kworoberwa n’okuramibwa. Iwe ahabwawe nomworobera kandi omuramya?

[Akabokisi/Ekishushani ekiri aha rupapura 18]

Ni Mpindahinduka ki ezi “Eiguru Erisya Hamwe n’Ensi Ensya” Birireetaho?

Ensi eryahindurwa ebe Ekibanja kya Ruhanga Luka 23:43

Emirimo erikwesiimisa, eby’okurya bingi Isaaya 25:6; 65:17, 21-23

Ensi eri omu bumwe omu kuramya Ruhanga ow’amazima Okushuuruurwa 15:3, 4

[Akabokisi/Ekishushani ekiri aha rupapura]

Noija Kugasirwa?

Ruhanga tabaasa kubeiha!—Tito 1:2.

Yehova naagira ati: “Ekigambo kyangye . . . tikirigaruka hariinye busha, kureka kiryahikiiriza ebi ndikwenda, kigire omugisha omuri ebyo ebi nkitumiire.”—Isaaya 55:11.

Yehova yaatandikire kuhanga “eiguru erisya n’ensi ensya.” Gavumenti ey’omu iguru yaatandikire kutegyeka. Omusingi ‘gw’ensi ensya’ gwaherize kuteebwaho.

Bwanyima y’okumanyisa bimwe aha bintu eby’okutangaaza ebi “eiguru erisya n’ensi ensya” birireetera abantu, ekitabo ky’Okushuuruurwa nikyoreka Ruhanga we wenka, Omutegyeki wa Byona arikugira ati: “Reeba nimpindura byona bisya.” Kandi naagira ati: “Handiika, ahakuba ebigambo ebi n’eby’okwesigwa kandi eby’amazima.”—Okushuuruurwa 21:1, 5. 

Ekibuuzo ekikuru n’eki, Itwe ahabwaitu nitukora empindahinduka ezirikwetengwa okubarirwa omuri abo abashemereire kuba ekicweka ‘ky’ensi ensya’ ahansi ‘y’eiguru erisya’?