Yesu Kristo—Niwe Mesia Owaaraganisiibwe

OKUTUHWERA kwetegyereza Mesia, Yehova Ruhanga akaha abarangi baingi ab’omuri Baibuli omwoyo orikwera, baahandiika omu bwijwire ebirikukwata aha kuzaarwa, obuheereza hamwe n’okufa kw’ogwo owaabaire araganisiibwe kuba Omujuni. Oburangi obu obw’omu Baibuli bwona bukahikiiririzibwa omuri Yesu Kristo. Ekirikutangaaza, buhikire kandi buhandiikirwe omu bwijwire. Okworeka eki, ka tureebe bimwe aha byarangirwe ebirikukwata aha kuzaarwa kwa Mesia hamwe n’obuto bwe.

Omurangi Isaaya akaragura ngu Mesia aryaba ari mwijukuru w’Omugabe Daudi. (Isaaya 9:7) Kandi kwo buzima, Yesu akazaarwa omu runyiriri rwa Daudi.—Matayo 1:1, 6-17.

Miika, ondiijo murangi wa Ruhanga, akaragura ngu omwana ogu akaba naija kuba omutegyeki kandi ngu akaba naija kuzaarirwa omuri “Betelehemu eya Efuraata.” (Miika 5:2) Obu Yesu yaazaarwa, hakaba hariho tauni ibiri omuri Israeli ezaabaire nizeetwa Betelehemu. Tauni emwe ekaba eri haihi na Nazareesi omu kicweka ky’omu matemba g’eihanga, kandi endiijo yo, ekaba eri haihi na Yerusaalemu omuri Yuda. Betelehemu eyaabaire eri haihi na Yerusaalemu omukubanza ekaba neeyetwa Efuraata. Yesu akazaarirwa omuri tauni egyo, buzima kwo nk’oku oburangi bwarangire!—Matayo 2:1.

Oburangi obundi bw’omuri Baibuli bukaragura ngu Omwana wa Ruhanga aryayetwa “kuruga Misri.” Akiri omwana, Yesu akatwarwa omuri Misri. Kandi akagarurwa kuruga omuri Misri bwanyima y’okufa kwa Heroode, butyo oburangi bwahikiirira.—Hosea 11:1; Matayo 2:15.

Omu kashanduuko aha rupapura 200, ebyahandiikirwe ebyayorekwa omu kacweka akaine omutwe “Ekyarangirwe” nibyoreka omu bwijwire ebirikukwata ahari Mesia. Nooshabwa kugyeragyeranisa ebyahandiikirwe ebi n’ebyayorekwa ahansi y’omutwe “Oku kyahikiriire.” Okukora ekyo nikwija kwongyera kuhamya okwikiriza kwawe omu kuhikiirira kw’Ekigambo kya Ruhanga.

Omu kushwijuma ebyahandiikirwe ebi, guma noijuka ngu ebyo ebirikukwata aha burangi bikahandiikwa hakirikuburayo emyaka mingi Yesu akabona kuzaarwa. Yesu akagira ati: “Byona bishemereire kuhikiirizibwa ebyampandiikirweho omu biragiro bya Musa n’omu bya baanabi n’omuri Zaaburi.” (Luka 24:44) Nk’oku orikubaasa kukihamya kuruga omu Baibuli yaawe, buzima ebi byona bikahikiirizibwa—omu bwijwire!

[Ekipande aha rupapura 200]

OBURANGI OBURIKUKWATA AHARI MESIA

EKYAKUBAIREHO EKYARANGIRWE OKU KYAHIKIRIIRE

Kuzaarwa omu ruganda rwa Yuda Okutandika 49:10 Luka 3:23-33

Kuzaarwa omukazi oshugaine Isaaya 7:14 Matayo 1:18-25

Kukomooka aha Mugabe Daudi Isaaya 9:7 Matayo 1:1, 6-17

Yehova okuhamya ku ari Omwana we Zaaburi 2:7 Matayo 3:17

Okuteerera ebijwaro bye enteeny Zaaburi 22:18 Matayo 27:35

Okuziikwa n’omutungi Isaaya 53:9 Matayo 27:57-60