Ekicweka 10

Abarikuhurikiza Ruhanga Nibaija Kutunga Migisha Ki?

Teekateeka aha migisha ei oraatungye omu biro by’omumaisho ku oraagume noohurikiza Yehova! Noija kugira amagara agahikiriire ahabw’okuba tihariho orirwara nari oriba ekimuga. Tiharikwija kubaho bantu babi, noija kubaasa kwesiga buri omwe.

Tiharikwija kubaho busaasi, enaku nari amarira. Tihariho orikwija kukaikura nari kufa.

Baingi abaafiire nibaija kuzoorwa batuure omu nsi. Ebyakozirwe 24:15

Noija kuba oyetooroirwe abanyabuzaare n’abanywani. Nikiija kushemeza okutuura omu Paradiso.

Paradiso terikwija kubamu ebirikutiinisa. Abantu nibaija kushemererwa buzima.

Obukama bwa Ruhanga nibwija kumaraho okubonabona kwona. Okushuuruurwa 21:3, 4