“Reeba Nimpindura Byona Bisya”

Nooyenda ngu otungye amagara marungi kandi ohangaare hamwe n’ab’omu ka yaawe? Oine ekihika ky’okutuura omu nsi etarimu busaasi, okubonabona hamwe n’okufa? Ensi nk’egyo buzima neija kubaho. Yehova Ruhanga naaraganisa ngu ensi ensya erimu okuhikiirira eri haihi kubaho. Yetegyereze oku Ruhanga araahikiirize ekyo omu Okushuuruurwa 21:3-5.​—Kishome.

“[Ruhanga] aryaragaza amarira goona aha maisho gaabo.” (Okushuuruurwa 21:4) Naija kuragaza marira ga muringo ki? Aga ti marira g’okushemererwa nari agarikurinda amaisho gaitu. Ruhanga naagamba aha marira agarikureetwa okubonabona n’obusaasi. Naija kwihiraho kimwe amarira goona agarikureetwa okubonabona n’obusaasi.

“Tiharibaho kufa bundi.” (Okushuuruurwa 21:4) Okufa buzima nikwo kukizireyo kureetaho amarira. Abarikworobera Yehova naija kubacungura omuzigu rufu. Eki naija kukikora ata? Arikwihiraho kimwe ekyo ekirikureeta okufa, nikyo kibi eki twahungwire kuruga ahari Adamu. (Abarooma 5:12) Yehova naija kureetera abantu abarikumworobera kuba abahikiriire kurabira omu kitambo kya Yesu.a Rufu niwe muzigu orihererukayo “kwihwaho.” (1 Abakorinso 15:26) Obwo, abantu abeesigwa nibaija kutuuraho ebiro byona baine amagara agahikiriire nk’oku Ruhanga yaabaire naayenda.

‘Tiharibaho busaasi.’ (Okushuuruurwa 21:4) Ni busaasi bwa muringo ki oburikwija kuhwaho? Obusaasi bwona obw’omu biteekateeko, obw’enyehurira n’obw’omu mubiri obwareetsirweho ekibi n’okutahikiirira kandi obureeteire abantu baingi enaku, nibwija kuhwaho.

Buzima amarira, okufa, n’obusaasi nibiija kuhweraho kimwe. Kwonka noobaasa kwebuuza oti: ‘Ebi byona nibiija kuba nkahi?’ ‘Mbwenu shi Ruhanga naaraganisa ngu nibiija kuba omu iguru?’ Ngaaha. Yetegyereze enshonga ahabw’enki kiri kityo. Ey’okubanza, ekiraganiso eki nikitandika n’ebigambo ebi: ‘Eihema rya Ruhanga riri omu bantu,’ kandi abantu nibatuura omu nsi. (Okushuuruurwa 21:3) Eya kabiri, okuraganisa oku nikworeka ngu “tiharibaho kufa bundi” omu nsi egi etwire erimu rufu. Omu iguru tihakabayoga okufa, kwonka omu nsi abantu batwire nibafa. Hatariho kubanganisa, ebyo byona ebyayorekwa aharuguru nibiija kuba aha omu nsi.

Yehova naatuhamiza ngu ensi ensya neija kubaho. Ahonaaho yaaheza kugamba emigisha ei turaatungye, naatuhamiza ati: “Reeba nimpindura byona bisya.” Reero ayongyeraho ati: “Ebigambo ebi n’eby’okwesigwa kandi eby’amazima.” (Okushuuruurwa 21:5) Iwe n’ab’omu ka yaawe nimuhigwa kwega ebirikukiraho aha ku murikubaasa kuba bamwe ahari abo abaraareebe ebi Ruhanga yaaraganiise nibihikiirira.