Ni Muringo Ki Omurungi ogw’Okwetebeekanisiza Enteerane?

Ku oraabe nooyega Baibuli n’Abajurizi ba Yehova, noobaasa kuba nooteeraho kutebeekanisa kare ebi murikuba nimuza kwegaho. Okubaasa kugasirwa omu nteerane, ni kikuru obutoosha okuzetebeekanisiza otakazigiiremu.

Cwamu obu oraashome n’ahu oraashomere. Ni ryari obu orikubaasa kushoma otaireho omutima? Mbwenu shi n’omu kasheeshe otakatandikire emirimo yaawe nari n’omu mwabazyo nk’abaana baaheza kubyama? N’obu waakuba otarikubaasa kushoma kumara obwire buraingwa, noobaasa kushoma kumara obwire bukye, kandi otaikiriza hakagira ebyakuhuzya. Za omu mwanya ogwehereire kandi oyiheho ebirikubaasa kukuhuzya nka radiyo, tiivi nari esimu. Okushaba otakatandikire kushoma nikiija kukuhwera kuta ebiteekateeko byawe aha Kigambo kya Ruhanga beitu hatari aha birikukwerarikiriza.​—Abafilipi 4:6, 7.

Tebeekanisa gye orikushaza aha bi oraagarukyemu. Banza oteereho kwetegyereza ebi orikuza kushoma eki birikugambaho. Teekateeka aha mutwe gw’eishomo nari eshuura, yeetegyereze oku emitwe emikye erikuhikaana n’omutwe ogwo, kandi oshwijume ebishushani ebirimu n’ebibuuzo eby’okweijutsya ebirikworeka enshonga enkuru. Shoma buri kacweka, kandi oteereho kusherura eky’okugarukamu eky’ekibuuzo kyako. Shoma ebyahandiikirwe ebyorekirwe, kandi yeetegyereze oku birikuhikaana n’ebi orikushoma. (Ebyakozirwe 17:11) Waatunga eky’okugarukamu eky’ekibuuzo omu kacweka, kishazeho kikuhwere kukiijuka waaba ori omu nteerane. Baabuuza ekibuuzo omu nteerane, noobaasa kwimutsya omukono reero baakutoorana ogarukemu omu bigambo bikye.

Buri saabiiti waaguma nooshwijuma ebi murikuba nimuza kwegaho omu nteerane, noija kwongyera ebiteekateeko bisya by’omu Baibuli omu “ibiikiro” ryawe.​—Matayo 13:51, 52.

• Noobaasa kukora ki kuguma nooyetebeekanisiza enteerane?

• Noobaasa kutebeekanisa ota kugira eki waagarukamu omu nteerane?