Oku Twine Kwetebeekanisiza Oruteerane rw’Obuheereza
1. Oruteerane rw’Obuheereza rwine mugasho ki, kandi nitubaasa kurugasirwamu munonga tuta?
1 Oruteerane rw’Obuheereza rutairweho kutuhwera kuba ababuurizi barungi. Ekintu kikuru ekirikukira kugambwaho omu ruteerane rw’obuheereza n’okubuurira amakuru marungi g’Obukama, okuhindura abantu abeegi, hamwe n’okurangirira okucwa orubanja kwa Ruhanga okuri haihi kuhika. (Mat. 28:20; Mako 13:10; 2 Pet. 3:7) Nitugasirwa munonga omu ruteerane oru twaba twetebeekaniise gye kandi tukarwejumbamu.
2. Nitubaasa kwetebeekanisiza tuta okuhurikiza orubazo?
2 Orubazo: Ahu eby’Orubazo byine kwihwa nihakira kworekwa omu bi omugambi aine kwetegyereza. Noobaasa kuraba omu bi orubazo ruraarugyemu otwariiremu n’ebyahandiikirwe, reero oteekateeke aha ku orikubaasa kukoresa obuhabuzi obwo omu kubuurira.
3. Nitubaasa kukora ki kwetebeekanisiza ekicweka ekirimu okuhikaanisa ebiteekateeko?
3 Ebibuuzo n’Okuhikaanisa Ebiteekateeko: Ekicweka eki nikiija kwebemberwa nka Watchtower, n’enyanjura ngufu n’okuhendera kugufu. Ta omusitaari aha nshonga enkuru eziri omu buri kacweka, kandi yetebeekanise kugamba aha nshonga enkuru eziri omu kacweka ako.
4. Nitubaasa kuteebekanisa tuta okwejumba omu kugarukamu?
4 Okuhikaanisa Ebiteekateeko n’Abakuhurikiize: Ekicweka eki nikiija kuheebwa nka orubazo, kwonka omugambi naija kushaba abamuhurikiize bakyejumbemu. Waata omusitaari aha nshonga enkuru kandi okashoma n’ebyahandiikirwe ebyorekirwe, noija kubaasa kugarukamu ekibuuzo omu ruteerane. Ow’eishe-emwe oraabe naayebembera ekicweka eki naija kuteeraho kubuuza abamuhurikiize kugamba aha nshonga enkuru.
5. Niki ekiraije kutuhwera okugatsirwa munonga omu by’okureeberaho ebirikuheebwa?
5 Eby’Okureeberaho: Ebicweka ebimwe nibyija kuba nibitwariramu eby’okureeberaho ebyabaireho kworeka oku ebi murikwegaho birikubaasa kukoresibwa omu kicweka eki murikubuuriramu. Abareeberezi, ababuurizi ababuuriire obwire buraingwa, nari baapayoniya nibaija kushabwa kworeka eby’okureeberaho ebi. Okwetebeekanisiza ekicweka eki nikubaasa kutwariramu okuteekateeka aha ku kirikuza kwebemberwa. Enyanjura eziri omu Buheereza Bwaitu obw’Obukama zaakoresibwa omu ky’okureeberaho, teekateeka aha ku orikubaasa kuzita omu bigambo byawe waaba noobuurira abantu batari bamwe na bamwe. Hamya ngu oine ekitabo nari magaziini erikuza kukoresibwa omu ky’okureeberaho. Omu Kuramya kwanyu okw’Eka, ni kirungi kwegyeza omu nyanjura ezi.
6. Ahabw’enki tushemereire kwetebeekanisiza Oruteerane rw’Obuheereza?
6 Nitwija kugasirwa kihango omu Ruteerane rw’Obuheereza twaba twetebeekaniise kandi tukateekateeka munonga aha biragambweho. Twakuratira obuhabuzi obu nitwija kugaruranamu amaani. (Rom. 1:11, 12) Twayetebeekanisiza Oruteerane rw’Obuheereza, nitwija kugira byona ebirikwetengwa omu kukora omurimo ogutuhairwe.—2 Tim. 3:17.