Yehova Naatutendeka Kukora Omurimo Ogu
1. Yehova ku arikuha abantu omurimo, naabaha naki?
1 Yehova ku arikuha abantu omurimo naabaha n’obuhwezi obu barikwetenga kubaasa kugukora. Nk’eky’okureeberaho, Yehova ku yaagambiire Noa kwombeka obwato, ekintu eki Noa yaabaire atakakorahoga akamugambira n’oku araabwombeke. (Kut. 6:14-16) Yehova ku yaatumire Musa omuriisa w’entaama omucureezi aha bakuru b’Abaisraeli na Faraho, akamuhamiza ati: “Ndyaba ndi hamwe n’akanwa kaawe, nkuhabure ebi origamba.” (Kur. 4:12) N’omu murimo gwaitu gw’okubuurira amakuru marungi, Yehova naatuha obuhabuzi aha ku turaagukore. Naatutendeka kurabira omu Eishomero ry’Obuheereza n’Oruteerane rw’Obuheereza kubaasa kukora omurimo ogu. Nitubaasa kugasirwa tuta omu kutendekwa oku?
2. Nitubaasa kugasirwa tuta omu Eishomero ry’Obuheereza?
2 Eishomero ry’Obuheereza: Shoma kandi otebeekanise ebi muraayegye omu buri Eishomero ry’Obuheereza otakagiireyo. Reero ote omutima aha ku abaine embazo baaraazihe kikuhwere kwongyera kwegyesa gye. (Enf. 27:17) Ija omu ruteerane n’ekitabo Ministry School kandi okikorese. Orikwebembera eishomero yaagamba aha buhabuzi obukirimu bwanyima ya buri rubazo, ta omusitaari aha nshonga enkuru ezi orikwenda kugyenderaho kandi koresa omwanya gw’aha rubaju kugira ebindi ebi waahandiikaho. Kwonka omuringo murungi gw’okugasirwa omu eishomero eri, n’okuryejumbamu. Waarigiiremu? Waaheebwa orubazo, tebeekanisa gye kandi ogyendere aha buhabuzi obu oraaheebwe. Waaba ori omu kubuurira, koresa ebyo ebi oryegiremu.
3. Niki ekiraatuhwere kugasirwa omu Oruteerane rw’Obuheereza?
3 Oruteerane rw’Obuheereza: Twashoma kandi tukatebeekanisa bukiri kare kandi tukagira n’ebi twagarukamu, nikiija kutuhwera kuguma nitwijuka gye obuhabuzi oburikuheebwa omu ruteerane oru. Twagarukamu omu bugufu, baingi nibaija kutunga omugisha gw’okugarukamu. Ta omutima aha by’okureeberaho, kandi teeraho kugyendera aha buhabuzi bwona obu orikuteekateeka ngu nibwija kukuhwera kubuurira gye. Obuheereza Bwaitu obw’Obukama bwaba burimu ebicweka ebi orikuteekateeka ngu nibiija kukuhwera omu kubuurira kwawe, bibiikye biije bikuhwere.
4. Ahabw’enki tushemereire kukoresa gye obuhabuzi obu Yehova arikutuha arikututendeka?
4 Nk’oku emirimo eyaahairwe Noa na Musa yaabaire etoorobi, n’omurimo gwaitu gw’okubuurira amakuru marungi omu nsi yoona tigworobi. (Mat. 24:14) Nitubaasa kusingura twayesiga Yehova, Omwegyesa waitu Omukuru, kandi tukakoresa gye obuhabuzi obu arikutuha arikututendeka.—Isa. 30:20.