Obuhabuzi bw’Abo Abarikwebembera Ebicweka by’Oruteerane rw’Obuheereza
Okutandika n’akapapura ka Obuheereza Bwaitu obw’Obukama aka, ebigambo ebirikukoresibwa omu ntebeekanisa y’Oruteerane rw’Obuheereza bihindwirwemu. Obuhabuzi n’okwijukibwa ebiri ahaifo nibiija kwongyera kushoboorora ebyabaire byagambirweho omu Obuheereza Bwaitu obw’Obukama aka Mei 2009 omu kicweka ekyabaire kiine omutwe “Oku Twine Kwetebeekanisiza Oruteerane rw’Obuheereza.”
◼ Orubazo: Eki n’ekicweka eki omugambi arikukoresa ebimuhairwe atarikuhikaanisa ebiteekateeko n’abamuhurikiize. Omugambi ashemereire kuta omutima aha biraahwere munonga ekibiina.
◼ Ebibuuzo n’eby’Okugarukamu: Ekicweka eki nikiija kuba nikyebemberwa nka Watchtower, nikiija kuba nikitandikwa n’enyanjura ngufu kandi kirikuhenderwa omu bugufu kandi ebibuuzo by’obucweka bwona biine kubuuzibwa. Orikwebembera ekicweka ekyo ashemereire kwetantara kugamba bingi. Ebyahandiikirwe ebikuru nibibaasa kushomwa nk’oku obwire burakubaasise. Obucweka tibushemereire kushomwa okwihaho mwagambirwa kubushoma.
◼ Okuhikaanisa Ebiteekateeko: Ekicweka eki n’orubazo orurikutwariramu okuhikaanisa ebiteekateeko n’abakuhurikiize. Tikishemereire kuheebwa nk’orubazo kwonka, nari kubuuza ebibuuzo kwonka.
◼ Eby’Okureeberaho n’Okubuuza: Obuhabuzi oburikukwata aha by’okureeberaho nibworeka ngu ow’eishe-emwe oraaheebwe ekicweka ekyo niwe aine obujunaanizibwa bw’okusherura abaraakore eby’okureeberaho; we taine kukora eby’okureeberaho ebyo. Abo abu araatoorane kukora eby’okureeberaho ebyo baine kuba nibabaasa kworeka gye enshonga eriyo neegambwaho kandi bari eky’okureeberaho kirungi, kandi ashemereire kutebeekanisa nabo bukiri kare kyaba nikibaasika. Ni kirungi okutakoresa ababuurizi abasya omu by’okureeberaho arikwenda ngu batunge omugisha gw’okworeka eky’okureeberaho, n’obu abamwe barikubaasa kukoresibwa nk’abarikubuurirwa. Abarikworeka eky’okureeberaho bashemereire kuba nibareeba ababahurikiize. Abo abu araabuuze bashemereire kugarukamu bari aha puratifoomu beitu batari mu myanya ei bashutamimu. Abo abu araabuuze n’abaraakoresibwe omu by’okureeberaho, bashemereire kwegyezamu nawe. Orikwebembera ekicweka yaareeba ngu eshaaha zaagyenda, ashemereire kutuubya aha bi arikuza kugamba, omu mwanya gw’okwihamu eby’okureeberaho. Abaheereza bashemereire kubuuza omuhikaanisa w’akakiiko k’abareeberezi nari ondiijo mureeberezi batakatooraine abu baraakorese omu by’okureeberaho.
Ekicweka kyaba kirimu obuhabuzi bw’omutaano bushemereire kukuratirwa gye. Ab’eishe-emwe baayebembera ebicweka by’Oruteerane rw’Obuheereza nk’oku kyayorekwa aha ruguru, Enteerane z’Obuheereza niziza ‘kubaho omu buteeka.’—1 Kor. 14:40.