Eibiikiro ry’Ebitabo ery’Ekyombeko ky’Obukama Niritugasira Rita?

Nooyenda kucondooza kubaasa kwongyera aha ku orikwetegyereza Baibuli? Haine eki orikwenda kushoborokyerwa aha biri omu Baibuli, nk’ekyahandiikirwe, ebirikukwata aha muntu nari omwanya? Nari butoosha nooyebuuza yaaba Ekigambo kya Ruhanga kirikubaasa kukuhwera omu nshonga ezirikukukwataho? Noobaasa kuza omu ibiikiro ry’ebitabo ery’Ekyombeko ky’Obukama kucondooza aha nshonga ezo.

Harimu bingi ebirikuhwera omu kucondooza. Noobaasa kuba otaine ebitabo byona eby’Abajurizi ba Yehova ebiriho omu rurimi rwawe. Kwonka omu ibiikiro eryo nihabaasa kuba harimu ebitabo ebi otaine. Niribaasa kuba ririmu na Baibuli zitari zimwe, kashoboorozi nungi y’ebigambo n’ebindi ebirikuhwera omu kucondooza. Noobaasa kuza omu ibiikiro eryo kucondooza, enteerane zitakatandikire nari zahwa. Haaba harimu kompyuta neebaasa kuba eriho Watchtower Library. Egi ni puroguramu ya kompyuta erikuba eriho ebitabo bingi kandi eyorobi kukoresa waaba oine ebi orikucondoozaho.

Nirihwera munonga abarikuba baine ebicweka omu Obuheereza Bwaitu n’Oku Turikutwaza. Eibiikiro ry’ebitabo ery’Ekyombeko ky’Obukama niribaasa kukuhwera waaba nootebeekanisa ekicweka kyawe. Orikwebembera oruteerane rw’Obuheereza Bwaitu n’Oku Turikutwaza niwe arikureeberera eibiikiro ry’ebitabo. Aine kuhamya ngu ebitabo ebisya birimu kandi bitebeekanisiibwe gye. Omureeberezi w’eishomero nari orikukwegyesa Baibuli naabaasa kukuhwera omu kucondooza kwawe. Tihaine oshemereire kutwara ebitabo by’eibiikiro eryo aheeru y’Ekyombeko ky’Obukama. Kandi ebitabo ebyo twine kubikwata gye kandi tutabihandiikamu.

Baibuli neegira ngu kubaasa kutunga okumanya okurikukwata ahari Ruhanga, twine kukusherura “nk’eky’eitungo ekisherekirwe.” (Enfumu 2:1-5) Eibiikiro ry’ebitabo ery’Ekyombeko ky’Obukama niribaasa kukuhwera omu kusherura kwawe.

• Ni bintu ki ebiri omu ibiikiro ry’ebitabo ery’Ekyombeko ky’Obukama?

• N’oha orikubaasa kukuhwera kukoresa gye eibikiiro ry’ebitabo eryo?