EISHOMO 6
Abaafiire Baryagaruka Kuba Abahuriire?
1. Ni makuru ki amarungi aha bikwatiraine n’abaafiire?
Yesu obu yaahika Besania haihi na Yerusaalemu, munywani we Laazaaro akaba amazire ebiro bina afiire. Banyaanya Laazaaro, Mariza na Mariamu bakagyenda na Yesu aha kituuro. Bwanyima hakaija n’abandi baingi. Mariza na Mariamu ka baashemereirwe Yesu ku yaazoire Laazaaro!—Shoma Yohaana 11:21-24, 38-44.
Mariza akaba naamanya amakuru marungi aha bikwatiraine n’abaafiire. Akaba naamanya ngu Yehova naija kuzoora abafu baagarukye batuure omu nsi.—Shoma Yobu 14:14, 15.
2. Omuntu ku arikufa haine ekirikumurugamu kikaguma kihuriire?
Ruhanga akagambira Adamu ati: “Ori omucuucu, n’omu mucuucu nimwo origaruka.”—OKUTANDIKA 3:19.
Omuntu akahangwa omu mucuucu. (Okutandika 2:7; 3:19) Twafa tihaine ekirikuturugamu kikaguma kihuriire. Kureka obwonko bwaitu niburekyera aho kukora n’ebiteekateeko byaitu bihwaho. N’ahabw’ekyo, Laazaaro tihaine eki yaagambire aha bikwatiraine n’okufa kwe ahakuba abafu tibagira ki bamanya.—Shoma Zaaburi 146:4; Omubuurizi 9:5, 6, 10.
Mbwenu shi abantu baafa, Ruhanga naababonabonesa omu muriro? Enyegyesa egyo egwire ahakuba Baibuli neegira ngu abafu tibagira ki bamanya. Eky’okubonabonesa abantu omu muriro naakyangira kimwe.—Shoma Yeremia 7:31.
3. Mbwenu shi abafu nibabaasa kugamba naitwe?
Abafu tibarikubaasa kugamba nari kuhuurira. (Zaaburi 115:17) Kwonka baamaraika abamwe ni babi, nibabaasa kugamba n’abantu kandi beshushanirize nk’abantu abaafiire. (2 Petero 2:4) Yehova naayanga okuteeraho kwehanuuza aha bafu.—Shoma Eky’Ebiragiro 18:10, 11.
4. Ni baahi abarizoorwa?
Abantu baingi abaafiire nibaija kuzooka batuure omu nsi. N’abamwe abaakozire ebibi ahabw’okutamanya Ruhanga nibaija kuzoorwa.—Ebyakozirwe 24:15.
Abaraazooke nibaija kwegyesibwa ebirikukwata ahari Ruhanga kandi boorekye ngu nibaikiririza omuri Yesu barikumworobera. (Okushuuruurwa 20:11-13) Ku barikora ebirungi baraatuura omu nsi ebiro byona.—Shoma Yohaana 5:28, 29.
5. Okuzooka nikworeka ki ahari Yehova?
Ruhanga okwohereza Omwana we kutufeera nikitubaasisa kugira amatsiko g’okuzooka. N’ahabw’ekyo, okuzooka nikworeka ngu Yehova naatukunda kandi ngu atwiniire embabazi. Abantu ku barizoorwa, n’oha ou oyiniire ekihika kureeba?—Shoma Yohaana 3:16; Abarooma 6:23.