EISHOMO 8
Ahabw’Enki Ruhanga Naareka Okubonabona Kukabaho?
1. Okubonabona kukatandika kuta?
Ruhanga arekire abantu kutegyeka kumara obwire buraingwa okworeka ngu tibarikubaasa kumaraho oburemeezi bw’abantu
Okubonabona kukatandika obu Sitaane yaabeiha omurundi gw’okubanza. Omu kubanza akaba ari maraika murungi, kwonka “taragumiire mu mazima.” (Yohaana 8:44) Akenda ngu abantu bamuramye omu mwanya gw’okuramya Ruhanga. Sitaane akabeiha Haawa ngu amworobere omu mwanya gw’okworobera Ruhanga. Adamu akeegaita ahari Haawa nawe yaagomera Ruhanga. Okugoma kwa Adamu kukakomookaho okubonabona n’okufa.—Shoma Okutandika 3:1-6, 19.
Obu Sitaane yaagambira Haawa kugomera Ruhanga, nibwo yaatandika kuhakanisa obushoboorozi bwa Ruhanga obw’okutegyeka. Abantu baingi beegaitsire ahari Sitaane baayanga Ruhanga kuba omutegyeki waabo. Nikyo Sitaane yaahindukiire “omutegyeki w’ensi.”—Shoma Yohaana 14:30; 1 Yohaana 5:19.
2. Mbwenu shi ebi Ruhanga yaahangire bikaba biine akamogo?
Ebi Ruhanga yaahangire byona bikaba bitaine kamogo. Abantu na baamaraika bakaba nibabaasa kworobera Ruhanga omu muringo oguhikire. (Eky’Ebiragiro 32:4, 5) Ruhanga akatuhanga twine obugabe bw’okucwamu kukora ekihikire nari ekitahikire. Obugabe obwo nibutuha omugisha kworeka ngu nitukunda Ruhanga.—Shoma Yakobo 1:13-15; 1 Yohaana 5:3.
3. Ahabw’enki Ruhanga akirekireho okubonabona?
Yehova akirekireho abarikuhakanisa obushoboorozi bwe bw’okutegyeka. Ahabw’enki? Naayenda kworeka ngu obutegyeki obwe bwonka nibwo buraamareho oburemeezi bw’abantu. (Omubuurizi 7:29; 8:9) Ekyo kyeyorekire gye omu myaka 6,000 ehingwire. Obutegyeki bw’abantu buremirwe kumaraho entaro, okuhenda ebiragiro, obutari buringaaniza n’endwara.—Shoma Yeremia 10:23; Okuruga 9:16.
Obutegyeki bwa Ruhanga bwo nibugasira abarikubwikiriza. (Isaaya 48:17, 18) Yehova ari haihi kwihaho obutegyeki bw’abantu bwona. Abo bonka abarikushagika obutegyeki bwa Ruhanga nibo baratuure omu nsi.—Isaaya 11:9. Shoma Danieli 2:44.
4. Okugumisiriza kwa Ruhanga nikutubaasisa kukora ki?
Sitaane naagira ngu abantu nibaheereza Yehova ahabw’ebintu ebi arikubaha. Noobaasa kworeka ngu buzima ekyo n’ekishuba. Okugumisiriza kwa Ruhanga nikutubaasisa kworeka yaaba nitukunda obutegyeki bwe nari obw’abantu. Ekyo nitukyoreka omu mitwarize yaitu.—Shoma Yobu 1:8-12; Enfumu 27:11.
5. Nitubaasa kworeka tuta ngu Ruhanga niwe mutegyeki waitu?
Ebi turikucwamu nibyoreka yaaba nitutwara Ruhanga nk’omutegyeki waitu
Nitubaasa kukyoreka turikuza omu kuramya okw’amazima okurikugambwaho omu Baibuli. (Yohaana 4:23) Nka Yesu, nitwanga obutegyeki bwa Sitaane tutarikwejwanzya omu by’obutegyeki nari omu ntaro.—Shoma Yohaana 17:14.
Sitaane naarebekyesa ebikorwa bibi nka birungi. Ku turikwanga ebikorwa bibi nk’ebyo, bamwe ahari banywani baitu n’abanyabuzaare nibabaasa kutujuma nari kutuhakanisa. (1 Petero 4:3, 4) N’ahabw’ekyo twine kucwamu. Nitwija kunywana abantu abarikukunda Ruhanga? Nitwija kworobera ebiragiro bye? Twakora tutyo, nitworeka ngu Sitaane akabeiha obu yaagira ngu tihaine orikubaasa kworobera Ruhanga yaaba aine oburemeezi.—Shoma 1 Abakorinso 6:9, 10; 15:33.
Rukundo ei Ruhanga ainiire abantu neija kumureetera kumaraho okubonabona kwona. Abo abarikworeka ngu nibaikiriza eki, nibaija kutunga amagara agatahwaho omu nsi ebiro byona.—Shoma Yohaana 3:16.