EBIBUUZO AHA BY’OMU BAIBULI NIBIGARUKWAMU
N’oha buzima orikutegyeka ensi egi?
Ku ogire ngu Ruhanga niwe arikutegyeka ensi egi, mbwenu shi ekaabaire erimu okubonabona kwingi?
Abantu baingi nibateekateeka ngu Ruhanga niwe arikutegyeka ensi egi. Ku ogire ngu Ruhanga niwe arikutegyeka ensi egi, mbwenu shi ekaabaire eijwiremu okubonabona? (Eky’Ebiragiro 32:4, 5) Kurugiirira ahari Baibuli, ensi neetegyekwa omubi.—Shoma 1 Yohaana 5:19.
Omubi ogwo akaija ata kutegyeka ensi? Aha kutandika kw’okubaho kw’abantu, maraika akagomera Ruhanga kandi yaahiga n’abantu babiri ab’okubanza nabo kugoma. (Okutandika 3:1-6) Abantu babiri abo bakacwamu kukuratira maraika omugomi Sitaane, atyo yaahinduka omutegyeki waabo. Ruhanga ow’Obushoboorozi Bwona niwe wenka ohikire kutegyeka, kwonka naayenda ngu abantu bacwemu ngu abategyekye ahabw’okugira ngu nibamukunda. (Eky’Ebiragiro 6:6; 30:16, 19) Kwonka eky’obusaasi, abantu baingi bacwiremu kugoma nk’oku abantu babiri b’okubanza baakozire.—Shoma Okushuuruurwa 12:9.
N’oha orikwija kwihaho oburemeezi bw’abantu?
Mbwenu shi Ruhanga naija kwikiriza Sitaane kugumizamu naategyeka? Ngaaha! Ruhanga naija kukoresa Yesu kwihaho obubi obu Sitaane areetsireho.—Shoma 1 Yohaana 3:8.
Ruhanga naija kuha Yesu amaani g’okucwekyereza Sitaane. (Abarooma 16:20) Reero bwanyima, Ruhanga naija kutegyeka abantu abareetere kugira okushemererwa n’obusingye nk’oku yaabaire agyendereire omu kubanza.—Shoma Okushuuruurwa 21:3-5.