Eka Yaanyu Neebaasa Kubamu Eta Okushemererwa?

1. Obushwere obuhikire nibubaasisa buta eka kubamu okushemererwa?

Amakuru marungi nigaruga ahari Ruhanga oine okushemererwa Yehova, orikwenda ngu amaka gagire okushemererwa. Niwe yaatandikire obushwere. Obushwere obuhikire nibubaasisa eka kubamu okushemererwa ahakuba abazaire n’abaana nibahurira baine oburinzi. Abakristaayo bashemereire kworobera ebiragiro eby’omu kicweka kyabo ebirikureetera obushwere kuba obuhikire.​—Shoma Luka 2:1, 4, 5.

Ruhanga naagamba ki aha bushwere? Naayenda ngu ababurimu babugumiremu kimwe. Yehova naayenda ngu abashweraine bagume kumwe nibeesigana. (Abaheburaayo 13:4) Naayangira kimwe okugaitururwa. (Malaki 2:16) Kwonka naikiiriza Omukristaayo kugaitururwa akagaruka akashwera nari akashwerwa, ou ari nawe omu bushwere yaashambana.​—Shoma Matayo 19:3-6, 9.

2. Omushaija n’omukazi we bashemereire kutwarizana bata?

Yehova akahanga omushaija n’omukazi kuhwerahwerana omu bushwere. (Okutandika 2:18) Omushaija nk’omutwe gw’eka niwe aine obujunaanizibwa bw’okuha ab’omu ka ye ebi barikwetenga n’okubeegyesa ebirikukwata ahari Ruhanga. Ashemereire kugirira omukazi we rukundo erimu okwefeerereza. Omushaija n’omukazi we bashemereire kukundana kandi bakahaana ekitiinisa. Obu barikuba bari abatahikiriire, okusaasirana ni kikuru ahakuba nikibahwera kugira okushemererwa omu bushwere.​—Shoma Abaefeso 4:31, 32; 5:22-25, 33; 1 Petero 3:7.

3. Mbwenu shi waaba otaine kushemererwa omu bushwere bwawe oine kuburugamu?

Mwaba mwine oburemeezi omu bushwere bwanyu, mwembi mwine kuteeraho kutwarizana omu muringo gwa rukundo. (1 Abakorinso 13:4, 5) Ekigambo kya Ruhanga tikirikushagika okutaana nk’omuringo gw’okushoboorora oburemeezi bukye oburikubaho omu bushwere.​—Shoma 1 Abakorinso 7:10-13.

4. Ruhanga naayendeza ki abaana?

Yehova naayenda ngu mushemererwe. Naabaha obuhabuzi oburikukirayo oburungi aha ku mushemereire kutwaza. Naayenda ngu mworobere abazaire baanyu ahakuba nibamanya bingi okubakira. (Abakolosai 3:20) Yehova naayenda ngu mutungye okushemererwa ahabw’okuheereza Omuhangi waanyu n’okukuratira Omwana we.​—Shoma Omubuurizi 11:9–12:1; Matayo 19:13-15; 21:15, 16.

5. Abazaire mwine kukora ki kuhwera abaana baanyu kugira okushemererwa?

Mushemereire kukora n’amaani kutungira abaana baanyu eby’okurya, oburaaro n’eby’okujwara. (1 Timoseo 5:8) Kwonka abaana baanyu okubaasa kutunga okushemererwa, mwine kubeegyesa kukunda Ruhanga n’okumutooreza. (Abaefeso 6:4) Mwayoreka ngu nimukunda Ruhanga, abaana baanyu nibabaasa kubatooreza. Mwabeegyesa murikukoresa Ekigambo kya Ruhanga, nibaija kugira emiteekateekyere mirungi.​—Shoma Eky’Ebiragiro 6:4-7; Enfumu 22:6.

Abaana waabasiima kandi okabahiga nikibashemeza. Oine kubahana kandi okabahabura. Okubatendeka nk’okwo nikubarinda emitwarize mibi erikubaasa kubaremesa kushemererwa. (Enfumu 22:15) Kwonka timushemereire kubahana omu muringo gw’obushaarizi.​—Shoma Abakolosai 3:21.

Abajurizi ba Yehova nibateera ebitabo ebirikubaasa kuhwera abazaire n’abaana. Ebitabo ebi birimu obuhabuzi kuruga omu Baibuli.​—Shoma Zaaburi 19:7, 11.