EBIBUUZO AHA BY’OMU BAIBULI NIBIGARUKWAMU

Niki ekirikureetera obushwere kubamu okushemererwa?

Obuhabuzi bwa Baibuli nibuhwera obushwere kubamu okushemererwa ahabw’okuba niburuga ahari Yehova Ruhanga Owaabutandikireho. Baibuli neehabura abari omu bushwere kugira emitwarize erikubaasa kureetamu okushemererwa kandi ebarabura n’aha miteekateekyere erikubaasa kubushiisha. Kandi neeyegyesa emiringo mirungi y’okugaaniira, ekirikwongyera aha kushemererwa omu bushwere.​—Shoma Abakolosai 3:8-10, 12-14.

Ni kugaaniira kwa muringo ki okurikureeta okushemererwa omu bushwere?

Abashweraine baine kuhaana ekitiinisa. Buri omwe ku arikuhikiiriza obujunaanizibwa bwe obu yaahairwe Ruhanga, nibatunga okushemererwa.​—Shoma Abakolosai 3:18, 19.

Niki ekirikureetera obushwere kuhangaara?

Abashweraine baaba nibakundana nikibahwera kuguma kumwe. Ruhanga naatwegyesa oku turikubaasa kukundana. Ruhanga n’omwana we Yesu bakataho eky’okureeberaho kirungi ekya rukundo erimu okwefeerereza.​—Shoma 1 Yohaana 4:7, 8, 19.

Abashweraine baaha ekitiinisa entebeekanisa ya Ruhanga ey’obushwere, nikibahwera kuguma kumwe. Ruhanga akatandikaho obushwere kuba obw’obutwire kugira ngu omushaija n’omukazi we bagire eka erimu oburinzi. Obushwere nibubaasa kuhangaara ahabw’okuba Ruhanga akahanga omushaija n’omukazi buri omwe arikwetenga mugyenzi we. Kandi akabahanga omu kishushani kye, barikubaasa kutooreza rukundo ye.​—Shoma Okutandika 1:27; 2:18, 24.