Niki Ekirikureeta Okushemererwa omu Ka?

EKI BAIBULI ERIKWEGYESA

“Abaine omugisha n’abahurira ekigambo kya Ruhanga bakakyorobera.” ​—Luka 11:28, Baibuli ey’Orunyankore-Rukiga, eya 1964.

OKU ORIKUGASIRWA WAIKIRIZA EKYO

Nihabaho okukundana.​—Abaefeso 5:28, 29.

Nihabaho okuhaana ekitiinisa.​—Abaefeso 5:33.

Nihabaho obumwe.​—Mako 10:6-9.

NITUBAASA KWIKIRIZA EKI BAIBULI ERIKUGAMBA?

Eego, ahabw’enshonga nka ibiri:

• Ruhanga niwe yaatandikireho eka. Baibuli neegira ngu amaka goona nigetererwa eiziina rya Yehova Ruhanga. (Abaefeso 3:14, 15) Ekirikumanyisa ngu eka eriho ahabw’okugira ngu Yehova niwe yaagitandikireho. Ahabw’enki ni kikuru okumanya ekyo?

  Teekateeka ahari eki: Waarya eby’okurya bikakunurira okenda kumanya ebi baatamu, okaabuuza oha? Noobuuza owaabiteeka.

  Nikyo kimwe, twaba nitwenda kumanya ekiraareete okushemererwa omu ka, twine kusherura obuhabuzi ahari Yehova owaatandikireho eka.​—Okutandika 2:18-24.

• Ruhanga naakufaho. Amaka gaine kusherura obuhabuzi ahari Yehova, obu arikuha kurabira omu Kigambo kye. Ahabw’enki? “Ahabw’okuba naabataho omutima.” (1 Petero 5:6, 7) Yehova naatufaho munonga kandi obuhabuzi obu arikutuha nibutugasira butoosha!​—Enfumu 3:5, 6; Isaaya 48:17, 18.