Obumwe Noohurira Ori nk’Otsigirweho Kandi Otiinire?

Reeba omwojo ogu omu kishushani. Ari wenka kandi atiinire, tikwo? Oreehurireho nk’omwojo ogu?— Obumwe naitwe nitwehurira tutyo. Hariho banywani ba Yehova abarikugambwaho omu Baibuli abaabaire nibeehurira nk’abatsigirweho kandi barikutiina. Omwe aharibo ni Eliya. Ka twegye ebirikumukwataho.

Eliya akaba naatuura omuri Israeli, Yesu atakazairwe. Ahabu, omugabe wa Israeli, akaba atarikuramya Ruhanga ow’amazima, Yehova. Ahabu n’omukazi we, Yezebeeli, bakaba nibaramya Baali ruhanga ow’ebishuba. N’ahabw’ekyo abantu baingi omuri Israeli nabo bakatandika kuramya Baali. Omugabekazi Yezebeeli akaba naatwaza kubi kandi arikwenda kwita abantu boona abaabaire nibaramya Yehova, otwariiremu na Eliya. Noomanya eki Eliya yaakozire?—

Eliya akairuka yaaza omu ihamba yaayeshereka omu nyanga. Ahabw’enki yaakozire ekyo?— Akaba atiinire. Kwonka Eliya akaba atashemereire kutiina. Ahabw’enki? Ahakuba akaba naamanya ngu Yehova naabaasa kumuhwera. Enyimaho, Yehova akaba yaayorekire Eliya ngu aine amaani. Omurundi gumwe Yehova akagarukamu okushaba kwa Eliya arikwohereza omuriro kuruga omu iguru. N’ahabw’ekyo Yehova akaba naaza kugaruka amuhwere.

Eliya ku yaabaire ayeesherekire omu nyanga, Yehova akamubuuza ati: “Nookora ki aha?” Eliya yamugarukamu ati: ‘Niinye nyenka okitsigaireho ndikukuramya, kandi ntiinire ahabw’okuba naanye nibenda kuunyita.’ Eliya akaba naateekateeka ngu boona abaabaire nibaramya Yehova bakaitwa. Kwonka Yehova akagambira Eliya ati: ‘Ngaaha, ekyo tikwo kiri. Hariho abantu 7,000 abakitsigaireho abarikundamya. N’ahabw’ekyo ohame, ahakuba nkwiniire omurimo ogundi gw’okukora!’ Nooteekateeka ngu Eliya akashemererwa ku yaahuriire ekyo?—

Ekyabaire ahari Eliya nookyegaho ki?— Toshemereire kutiina. Oine abanywani abarikukunda Yehova kandi naiwe nibakukunda. Kandi Yehova ni Ruhanga ow’amaani, naija kukuhwera obutoosha. Nikikushemeza kumanya ngu nooba otariwenka?—