Yehova Akagumya Eliya

Yezebeeli akamanya ekyabaire ahari baanabi ba Baali, kandi akagira ekiniga kingi. Akatuma ahari Eliya naagira ati: ‘Nyencakare, nooza kufa nka baanabi abo.’ Eliya akatiina munonga kandi akahunga yaaza omu ihamba. Akashaba ati: ‘Mperere hi! Mbwenu, ai Yehova, nyita.’ Eliya akaba aruhire munonga, yaabyama ahansi y’omuti.

Maraika akamusisiimura mpora yaamugira ati: NkarekyerahoImuka orye.’ Eliya akareeba omugaati oguteekirwe aha mabaare garikwotsya n’orunywero rw’amaizi. Akarya kandi yaanywa yaagaruka yaabyama. Maraika akagaruka yaamwimutsya yaamugira ati: ‘Rya. Nooyetenga amaani omu rugyendo rwawe.’ N’ahabw’ekyo Eliya akagaruka yaarya. Bwanyima akagyenda kumara ebiro 40 nyomushana na nyekiro, okuhitsya obu yaahikire aha Rushozi Horebu. Aha mwanya ogwo Eliya akataaha omu nyanga kubyama. Kwonka Yehova akagamba nawe. Akamugira ati: ‘Eliya, nookora ki aha?’ Eliya akagira ati: ‘Abaisraeli baitsire endagaano yaawe. Baasheenya amatambiro gaawe, baita baanabi baawe. Kandi naanye nibenda kuunyita.’

Yehova akamugira ati: ‘Shohora, oyemerere ahari oru rushozi.’ Hakabanza kwija omuyaga mwingi gw’amaani gwashatura enshozi. Bwanyima, hakaija omutsitsa n’omuriro. Bwanyima, Eliya akahurira iraka ry’embabazi. Akeeshweka omunagiro aha maisho, yaashohora, yaayemerera aha munwa gw’enyanga. Yehova akamubuuza ahabw’enki yaayeshereka. Eliya akagarukamu ati: ‘Nyowe nyenka, niinye ntsigaireho.’ Kwonka Yehova akamugira ati: ‘Tori wenka. Hariho Abaisraeli 7,000 abakiri kundamya. Gyenda otoorane Elisa abe nabi omu mwanya gwawe.’ Ahonaaho, Eliya akagyenda kukora eki Yehova yaamugambiire. Nooteekateeka ngu naiwe Yehova naija kukuhwera waakora eki arikwenda ngu okore? Eego, naija kukuhwera. Ka tureebe ekindi ekyabaireho omu bwire bw’ekyanda.