Yeremia Tararekire Kugamba Ahari Yehova

Obumwe abantu nibaatuganiiza nari batugwerwa kubi ahabw’okubagambira ebirikukwata ahari Yehova. Ekyo nikibaasa kutureetera twareka kugamba ebirikumukwataho. Naiwe oreehurireho otyo?— Baibuli neegamba aha mutsigazi owaabaire naakunda Yehova kwonka owaabaire ari hakye kureka kugamba ebirikumukwataho. Akaba naayetwa Yeremia. Ka twongyere kwega ebirikumukwataho.

Obu Yeremia yaabaire ari omutsigazi, Yehova akamugambira kurabura abantu kureka kukora ebibi. Ekyo Yeremia tikiraamworobeire kandi akatiina. Akagambira Yehova ati: ‘Tindikumanya eky’okugamba; ahabw’okuba nkiri muto.’ Kwonka Yehova akamugarukamu ati: ‘Otatiina, ninyija kukuhwera.’

N’ahabw’ekyo Yeremia akatandika kurabura abantu ngu baaba batarekire kukora ebibi nibaija kufubirwa. Nooteekateeka ngu abantu bakakora ebi Yeremia yaabagambiire?— Ngaaha. Baakamuganiiza kandi baamugirira ekiniga. Abandi bakaba nibenda n’okumwita. Noogira ngu Yeremia akahurira ata?— Akatiina munonga kandi yaagira ati: ‘Ka ndekye kugamba ahari Yehova.’ Kwonka shi buzima akarekyeraho?— Ngaaha. Akaba naakunda Yehova munonga kandi atarikubaasa kureka kumugambaho. Ahabw’okugira ngu Yeremia akaguma naagamba ahari Yehova, akamurinda.

Nk’eky’okureeberaho, hariho obu abashaija babi baanaga Yeremia omu kiina ekiijwire ebyondo. Akaba ataine by’okurya nari amaizi. Abashaija abo bakaba nibenda ngu baamurekyemu afe. Kwonka Yehova akamuhwera yaarugamu.

Yeremia noobaasa kumwegaho ki?— Yeremia n’obu obumwe yaagizire okutiina, akaguma naagamba ahari Yehova. Waagamba ebirikukwata ahari Yehova, abantu abamwe nibaija kukugaaniiza nari baakugirire ekiniga. Ekyo nikibaasa kukureetera kuhemuka nari kutiina. Kwonka otarireka kugamba ahari Yehova. Naija kuguma naakuhwera nk’oku yaahweraire Yeremia.