Yehova Akatuma Yeremia Kubuurira

Yehova akatoorana Yeremia kuba nabi aha bantu ba Yuda. Akamugambira kubuurira abantu n’okubarabura kurekyera aho kukora ebintu bibi. Yeremia akagira ati: ‘Yehova, nkiri muto. Tindikumanya kugamba.’ Yehova akamugira ati: ‘Otatiina. Niinyija kukugambira ebi oraagambe. Niinyija kukuhwera.’

Yehova akagambira Yeremia kurundaana abakuru b’abantu, kandi ayatire orunywero omu maisho gaabo, reero abagire ati: ‘Yerusaalemu neija kucwekyerezibwa nk’orunywero oru.’ Yeremia ku yaakozire eki Yehova yaamugambiire kukora, abakuru bakamugirira ekiniga kingi. Omunyamurwa orikwetwa Pashuri akateera Yeremia kandi yaamuta omu kihome. Ekiro kyona, Yeremia akaba atarikubaasa kugyenda. Pashuri akamurekura akasheeshe akakuratsireho. Yeremia akagira ati: ‘Tindikubaasa kwemera eki omurundi ogundi. Niinyija kurekyera aho kubuurira.’ Kwonka shi akarekyera aho? Ngaaha. Yeremia ku yaagumire naakiteekateekaho, akagira ati: ‘Obutumwa bwa Yehova ni nk’omuriro oguri omunda yangye. Tindikubaasa kurekyera aho kubuurira.’ Yeremia akagumizamu naarabura abantu.

Ku haahingwireho emyaka, hakazaho omugabe musya omuri Yuda. Abanyamurwa na baanabi b’ebishuba bakanga obutumwa bwa Yeremia. Bakagambira abanyiginya bati: ‘Omushaija ogu ashemereire kwitwa.’ Yeremia akagira ati: ‘Mwanyita, nimwija kuba mwita omushaija otaine rubanja. Niingamba ebigambo bya Yehova, beitu bitari byangye.’ Abanyiginya ku baahuriire ekyo, bakagira bati: ‘Omushaija ogu tashemereire kufa.’

Yeremia akagumizamu naabuurira, kandi abanyiginya bakamugirira ekiniga kingi. Bakagambira omugabe kwita Yeremia. Omugabe akabagira ngu bakore Yeremia kyona eki barikwenda. Bakatwara Yeremia baamunaga omu kiziba kiraingwa ky’ebyondo, barikuteekateeka ngu naabaasa kufeera omu kiziba ekyo. Yeremia akatandika kutobera omu byondo.

Bwanyima mukuru w’abaserukare orikwetwa Ebedimeleki akagambira omugabe ati: ‘Abanyiginya baanaga Yeremia omu kiziba. Twamurekayo, naija kufa.’ Omugabe akaragiira Ebedimeleki kugyenda n’abashaija 30 kwiha Yeremia omu kiziba. Mbwenu shi titushemereire kuba nka Yeremia, otaraikiriize ekintu kyona kumuremesa kubuurira?