Musa Akacwamu Kuramya Yehova

Omuri Misri, eka ya Yakobo ekaba neemanywa nk’Abaisraeli. Bwanyima y’okufa kwa Yakobo na Yosefu, Faraho ondiijo akatandika kutegyeka. Akagira okutiina ahabw’okugira ngu Abaisraeli bakaguma nibeeyongyera kugira obushoboorozi kukira Abanyamisri. N’ahabw’ekyo Faraho akahindura Abaisraeli abahuuku. Akabaragiira kuteera amatafaari n’okukora emirimo y’amaani omu misiri. Kwonka Abanyamisri ku baabaire bongyera kukoresa munonga Abaisraeli, Abaisraeli bakaba beeyongyera kukanya. Ahabw’okugira ngu ekyo Faraho tarakikunzire, akaragiira ngu abaana b’aboojo ab’Abaisraeli abarazaarwe baitwe. Noobaasa kuteekateeka aha ku Abaisraeli baatiinire?

Omukazi Omwisraeli orikwetwa Yokebedi akazaara omwana w’omwojo murungi. Kubaasa kumurinda, akamuta omu kiibo kandi yaakita omu bifunjo aha rubaju rw’Omugyera Nilo. Miriamu, munyaanya w’ogwo mwana, akaguma haihi kureeba ekiraamubeho.

Muhara wa Faraho ku yaizire kunaaba omu mugyera, akareeba ekiibo. Omunda yaakyo akashanga harimu omwana arikurira, kandi akamugirira embabazi. Miriamu akabuuza ati: ‘Nze kukwetera omukazi orikubaasa kukurerera ogu mwana?’ Muhara wa Faraho ku yaagizire ngu eego, Miriamu akagyenda, yaayeta nyina w’omwana, Yokebedi. Muhara wa Faraho akamugira ati: ‘Twara omwana ogu, omunderere, naanye niinyija kukushashura.’

Omwana ku yaakuzire, Yokebedi yaamutwarira muhara wa Faraho, owaamwetsire Musa kandi akamukuza nk’omwana we. Musa akakura nk’omunyiginya kandi akaba naabaasa kutunga kyona eki arikwenda. Kwonka Musa tarayebirwe Yehova. Akaba naamanya ngu n’Omwisraeli, beitu atari Munyamisri. Kandi akacwamu kuheereza Yehova.

Musa ku yaabaire aine emyaka 40, akacwamu kuhwera abantu be. Musa ku yaareebire Omunyamisri naateera Omwisraeli, akateera munonga Omunyamisri yaamwita. Akashereka omutumbi gwe omu musheenyi. Faraho ku yaakihuriire, akateeraho kwita Musa. Kwonka Musa akahunga yaaza omu nsi ya Midiani. Yehova akamureeberera ari Midiani.