Ebibonaboneso Bishatu eby’Okubanza

Abaisraeli bakakoresibwa munonga nk’abahuuku. Yehova akoheereza Musa na Arooni kuza owa Faraho n’obutumwa obu: ‘Reka abantu bangye bagyende omu ihamba kugira ngu babaase kundamya.’ Faraho akagarukamu ati: ‘Yehova ogwo tindikumumanya, kandi tindikwija kurekura Abaisraeli kugyenda.’ Faraho akongyera kubakoresa munonga. Yehova akaba naija kwegyesa Faraho eishomo. Noomanya oku yaakikozire? Akareeta Ebibonaboneso Ikumi ahari Misri. Yehova akagambira Musa ati: ‘Faraho tarikwenda kumpurira. Omu kasheeshe, naija kuza aha Mugyera Nailo. Mugyende mumugambire ngu ahakuba ayangire kurekura abantu bangye kugyenda, amaizi goona omuri Nailo nigaija kuhinduka eshagama.’ Musa akoorobera Yehova yaaza owa Faraho. Faraho akareeba Arooni arikuteera enkoni omuri Nailo, kandi omugyera gukahinduka eshagama. Omugyera gukatandika kunuuka kubi, eby’enyanja byafa, kandi hakaba hatariho maizi marungi g’okunywa kuruga omuri Nailo. Faraho nabwo akanga kurekura Abaisraeli kugyenda.

Ku haahingwireho ebiro mushanju, Yehova akagaruka yaayoheereza Musa kuza owa Faraho n’obutumwa obu: ‘Ku oraayange kurekura abantu bangye, Misri neija kwijura ebikyere.’ Arooni akabanga omukono gwe aha maizi, ebikyere byashweka ensi yoona. Abantu bakashanga ebikyere omu maju gaabo, omu bitanda byabo, n’omu bakuri zaabo. Ebikyere bikaba biri buri hamwe! Faraho akagambira Musa ngu ayeshengyereze Yehova aiheho ekibonaboneso ekyo. Faraho akaraganisa ngu naija kurekura Abaisraeli bagyende. N’ahabw’ekyo Yehova akaihaho ekibonaboneso eki, kandi Abanyamisri bakarundaana emituumo mingi y’ebikyere bifiire. Ensi yoona ekatandika kunuuka kubi. Kwonka nabwo, Faraho akanga kurekura abantu kugyenda.

Yehova akagambira Musa ati: ‘Arooni aine kuteera enkoni omu mucuucu gw’aha nsi reero nigwija kuhinduka emikwikwi nari obukooko bukye burikutonera.’ Ahonaaho obukooko obwo bukaza buri hamwe. Bamwe aha bantu ba Faraho bakamugira bati: ‘Ekibonaboneso eki nikiruga ahari Ruhanga.’ Kwonka nabwo, Faraho akanga kwikiriza Abaisraeli kugyenda.