Tibarahamiire aha Kuraganisa Kwabo

Yehova akagambira Musa ati: ‘Inamuka, onshangye aha rushozi. Niinyija kukuha ebishate by’amabaare, ebihandiikirweho ebiragiro.’ Musa akainamuka aha rushozi yaagumayo kumara ebiro 40 nyomushana na ny’ekiro. Ku yaabaire ari aha rushozi, Yehova akahandiika Ebiragiro Ikumi aha bishate bibiri by’amabaare yaabiha Musa.

Ku haahingwireho obwire, Abaisraeli bakateekateeka ngu Musa abatsigireho. Bakagira Arooni bati: ‘Nitwenda ow’okutwebembera. Tukorere ruhanga!’ Arooni akabagira ati: ‘Mundeetere ezaabu zaanyu.’ Akaziheeshamu ekishushani ky’enimi. Abantu bakagira bati: ‘Ogu niwe Ruhanga waitu owaatwihire omu nsi ya Misri.’ Bakatandika kuramya ekishushani ky’enimi, baakora n’obugyenyi. Mbwenu ekyo kikaba kihikire? Ngaaha, ahakuba abantu bakaba baraaganiise ngu nibaija kuramya Yehova wenka. Kwonka hati bakaba bariyo nibahenda ekiraganiso ekyo.

Yehova akareeba ekyabaire nikibaho, kandi yaagambira Musa ati: ‘Irooko oshuume. Ahakuba abantu baangomeire. Baaramya ruhanga w’ebishuba.’ Musa akashuuma arikuruga aha rushozi, aine ebishate bibiri by’amabaare.

Musa ku yaabaire nairira haihi n’orusiisira, yaahurira abantu nibeeshongora. Akareeba nibazina kandi barikwinamira ekishushani ky’enimi. Musa akagira ekiniga kingi. Akatambika ebishate bibiri ebyo ahansi, byayatagurika. Ahonaaho akaatagura ekishushani eki baabaire bakozire. Musa akabuuza Arooni ati: ‘Abantu bakugizire bata, waaza kukora ekibi kihango kiti?’ Arooni akagira ati: ‘Otangirira ekiniga. Noomanya abantu aba. Baabaire nibenda ruhanga, n’ahabw’ekyo nnagire ezaabu zaabo omu muriro zaarugamu egyo nimi.’ Arooni akaba atashemereire kukora ekyo. Musa akagaruka aha rushozi kandi yaayeshengyereza Yehova kusaasira abantu.

Yehova akasaasira abaamworobeire. Waayetegyereza oku kyabaire kiri kikuru Abaisraeli kwikiriza Musa kubebembera?