Ekitebyo 36

Akanyana k’Ezaabu

AI BAAMBE! Abantu nibakora ki hati? Nibaramya akanyana! Ahabwaki nibakora eki?

Musa ku yaagumire aha rushozi kumara omwanya muraingwa, abantu baagira bati: ‘Titurikumanya ekihikire ahari Musa. N’ahabw’ekyo, ka tukore ruhanga oraatwebembere kuruga omu nsi egi.’

Mukuru wa Musa Arooni nikwo kugira ati: ‘Kare, mujuure empeta zaanyu ez’omu matu ez’ezaabu mutyo muzindetere.’ Ku baazimureeteire, Arooni yaaziyagisa omu muriro kandi yaakoramu akanyana k’ezaabu. Abantu baagira bati: ‘Ogu niwe Ruhanga waitu, owaatwihire omu nsi ya Misri! Bwanyima Abaisraeli baakora obugyenyi buhango, kandi baaramya akanyana k’ezaabu.

Yehova ku yaareebire eki, yaagira ekiniga kingi. Nikwo kugambira Musa ati: ‘Irooko oyehuute oshuume. Abantu basiisire munonga. Beebirwe ebiragiro byangye kandi nibaramya ekishushani ky’akanyana k’ezaabu.’

Musa yaayehuuta kushuma kuruga aha rushozi. Kandi ku yairiire haihi, eki nikyo yaareebire. Abantu nibeshongora kandi nibazina nibehinguririza ekishushani ky’akanyana k’ezaabu! Musa yaagira ekiniga kingi munonga yaateera ahansi ebishate by’amabaare ebyabaire bihandikireho ebiragiro, byayatagurika. Bwanyima yaatwara akanyana k’ezaabu, yaakayagisa, yaakacwa obusaasingo.

Abantu baakozire ekintu kibi munonga. N’ahabw’ekyo Musa agambira bamwe aha bashaija kukwata rurara zaabo. ‘Abantu boona ababi abaaramize akanyana k’ezaabu nibaragiirwa kwitwa,’ Musa aba nikwo yaagira. Batyo abashaija baita abantu 3,000! Eki tikirikworeka ngu nitwetenga kwegyendesereza, okuramya Yehova wenka batari baaruhanga boona abandi ab’ebishuba?

Okuruga 32:1-35.