Ekitebyo 35
Yehova Okuheereza Amateeka Ge
HAHINGWIREHO nk’ameezi abiri barugire omuri Misri, Abaisraeli bakahika aha rushozi Sinai, kandi orurikwetwa Horebu. Ogu nigwo mwanya ogu Yehova yaagambiriireho na Musa omu rushaka rurikwaka omuriro. Abantu bakora aha orusiisira kandi bagumaho kumara akaanya.
Abantu ku baabaire barindiriire aha, Musa yaatemba ahaiguru aha rushozi. Ahaiguru y’orushozi okwo, Yehova agambira Musa ngu Naayenda Abaisraeli kumworobera kandi n’okuba abantu Be ab’omutaano. Musa ku agaruka ahansi, agambira abantu ebi Yehova yaamugambira. Batyo abantu bagira ngu nibaija kworobera Yehova, ahabw’okuba nibenda kuba abantu be.
Yehova hati akora ekintu ekitari kya buriijo. Areetera akatwetwe k’orushozi kucumbuuka omwika n’enkuba kuhinda. Kandi agamba n’abantu ati: ‘Niinye Yehova Ruhanga waanyu owaabaihire omuri Misri.’ Kandi abaragiira ati: ‘Mutarigira baaruhanga abandi nyowe ndiho.’
Ruhanga aheereza Abaisraeli agandi mateeka nari shi ebindi biragiro mwenda. Abantu batiina munonga. Bagambira Musa bati: ‘Obe niiwe waagamba naitwe ahakuba twatiina ngu Ruhanga yaagamba naitwe nitubaasa kufa.’
Bwanyima Yehova yaagambira Musa ati: ‘Ija oyinamukye aha rushozi. Niinyija kukuha ebishate bibiri by’amabaare ahi mpandikire ebiragiro ebi ndikwenda abantu kukuratira.’ Atyo Musa yaagaruka yainamuka aha rushozi. Musa yaagumayo kumara ebiro 40 nyomushana na nyekiro.
Ruhanga ainiire abantu be ebiragiro bingi munonga. Musa ahandiika ebiragiro ebi. Ruhanga kandi aheereza Musa ebishate bibiri by’amabaare. Ahari ebi bishate, Ruhanga we wenka ahandikireho ebiragiro 10 ebi yaagambiire abantu boona. Nibyetwa Ebiragiro Ikumi.
Ebiragiro Ikumi n’ebiragiro bikuru munonga. Nikwo n’ebindi biragiro biri bikuru ebi Ruhanga yaaheereize Abaisraeli. Kimwe aha biragiro ebi n’eki: ‘Kunda Yehova Ruhanga waawe n’omutima gwawe gwona, n’obwengye bwawe bwona, n’amagara gaawe goona, n’amaani gaawe goona.’ Kandi ekindi n’eki: ‘Kunda mutaahi waawe nk’oku oyekunda.’ Yesu Kristo, omwana wa Ruhanga, akagira ngu ebi nibyo biragiro ebirikukirayo obukuru ebi Ruhanga yaaheereize abantu be, Abaisraeli. Bwanyima nitwija kwega bingi ebirikukwata aha mwana wa Ruhanga kandi n’enyegyesa ye.
Okuruga 19:1-25; 20:1-21; 24:12-18; 31:18; Eky’Ebiragiro 6:4-6; Abaleevi 19:18; Matayo 22:36-40.