Bakaraganisa Yehova

Bwanyima y’ameezi nk’abiri Abaisraeli barugire Misri, bakahika aha Rushozi Sinai kandi bateeraho amahema. Yehova akeeta Musa, yainamuka aha rushozi, reero yaamugira ati: ‘Ncungwire Abaisraeli. Ku barinyorobera kandi bakarinda ebiragiro byangye, baryaba abantu bangye abatoorainwe.’ Musa akashuuma yaaruga aha rushozi yaagambira Abaisraeli ebi Yehova yaagambiire. Bakagarukamu bata? Bakagira bati: ‘Byona ebi Yehova yaagamba nitwija kubikora.’

Musa akagaruka yainamuka aha rushozi. Yehova akamugira ati: ‘Aha kiro kya kashatu, niinyija kugamba naiwe. Ogambire abantu batakainamuka aha Rushozi Sinai.’ Musa akashuuma yaaruga aha rushozi yaagambira Abaisraeli kwetebeekanisa kuhurira Yehova.

Bwanyima y’ebiro bishatu, Abaisraeli bakareeba emirabyo erikutyankana n’ekicu kirikwiragura aha rushozi. Kandi bakahurira enkuba zirikuhinda n’eiraka ry’enzamba. Bwanyima Yehova akaashuma aha rushozi arikwizira omu muriro. Abaisraeli bakatiina baatandika kutetema. Orushozi rwona rukatengyeta munonga kandi rwijura omwika. Eiraka ry’enzamba rikoongyera kugamba munonga. Reero Ruhanga yaagira ati: ‘Niinye Yehova. Otarigira baaruhanga abandi, nyowe ndiho.’

Musa akagaruka yainamuka aha rushozi, kandi Yehova akamuha ebiragiro ebirikukwata aha ku abantu baabaire bashemereire kumuramya n’oku baabaire baine kutwaza. Musa akahandiika ebiragiro ebyo kandi yaabishomera Abaisraeli. Bakaraganisa bati: ‘Byona ebi Yehova yaagamba, nitwija kubikora.’ Eego, bakaraganisa Ruhanga. Kwonka shi bakaba nibaija kuhikiiriza ekiraganiso eki?