Gideoni Akasingura Abamidiani

Ku haahingwireho obwire, Israeli ekagaruka yaaruga ahari Yehova kandi yaagaruka kuramya baaruhanga b’ebishuba. Okumara emyaka mushanju, Abamidiani bakaba baiba amatungo g’Abaisraeli kandi baacwekyereza n’emisiri yaabo. Kubaasa kuhonoka ah’Abamidiani, Abaisraeli bakeeshereka omu nyanga z’amabaare n’omu nshozi. Bakeeshengyereza Yehova kubahwera. N’ahabw’ekyo, Yehova akoohereza maraika aha mushaija muto orikwetwa Gideoni. Maraika akagira ati: ‘Yehova atooraine iwe omushaija emanzi.’ Gideoni akabuuza ati: ‘Nimbaasa nta kujuna Israeli? Ndi muto.’

Gideoni akaba naija kumanya ata ngu Yehova amutooraine? Akata ebyoya by’entaama ahansi kandi yaagambira Yehova ati: ‘Omu kasheeshe, ku ndashangye ebyoya by’entaama bitonzirweho orume kwonka ahansi hoomire, niinyija kumanya ngu nooyenda kunjunisa Israeli.’ Akasheeshe akaakuratsireho, ebyoya by’entaama bikaba biriho orume kandi ahansi hoomire. Kwonka Gideoni akagaruka yaashaba ngu akasheeshe akandi ashangye ebyoya by’entaama byomire kandi ahansi hariho amaizi. Ekyo ku kyabaireho, Gideoni akahamya ngu Yehova amutooraine. Akateeranira hamwe abaserukare kurwanisa Abamidiani.

Yehova akagambira Gideoni ati: ‘Niinyija kujuna Abaisraeli. Kwonka abashaija abu oine ni baingi, nibabaasa kwehimbisa nibagira bati: Emikono yaitu niyo etujunire. Gambira orikutiina weena agarukye omuka.’ N’ahabw’ekyo abaserukare 22,000 bakagaruka omuka, kandi haakatsigaraho abaserukare 10,000. Bwanyima Yehova akagira ati: ‘Abaserukare bakiri baingi. Bashuumye aha mugyera, reero obagambire kunywa amaizi. Ogume n’abo bonka abaraanywe amaizi barikwerinda abazigu.’ Abashaija 300 bonka nibo baagumire beerinzire. Yehova akaraganisa ngu abashaija abo bakye bonka nibo baabaire nibaija kusingura abaserukare 135,000 b’Abamidiani.

Omu kiro ekyo, Yehova akagambira Gideoni ati: ‘Hati nibwo bwire bw’okutahiirira Abamidiani.’ Gideoni akakwatsa abashaija be enzamba n’enyungu zirimu emuri. Akabagira ati: ‘Mundeebereho, kandi oku ndaagire mube nikwo mwagira.’ Gideoni akateera enzamba ye, yaayata n’enyungu ye, akwatiire orumuri rwe ahaiguru, kandi yaateera orwari arikugira ati: ‘Rurara ya Yehova n’eya Gideoni.’ Abashaija 300 n’abo bakateera enzamba zaabo. Abamidiani bakatiina kandi bairuka nibatoora embaju zoona. Abamidiani boona bakatandika kwitana bonka na rurara. Omurundi ogundi, Yehova akahwera Abaisraeli kusingura abazigu baabo.