Yehova Ni Munywani Waitu Orikukirayo

1. Ahabw’okuhangwa omu nshusha ya Ruhanga, ekyo nikitubaasisa kukora ki?

ABANTU nibakira kukoresa enfumu egi ngu “empindu eshusha eki ebaziira.” Buzima, abaana baingi nibashusha abazaire baabo. Kandi ekyo kiri kityo ahabw’okugira ngu nibahungura emitwarize kuruga ahari ishebo na nyinabo. Yehova, Tataitwe ow’omu iguru niwe bukomooko bw’amagara. (Zab. 36:9) Twine emitwarize erikushushana n’eye ahabw’okugira ngu nitwetwa abaana be. Ahabw’okugira ngu tukahangwa omu nshusha ye, nitubaasa kuteekateeka, tucwemu kandi tugire emikago n’abandi.​—Kut. 1:26.

2. Yehova naihirira ahari ki kuba Munywani waitu?

² Yehova naabaasa kuba Munywani waitu orikukirayo. Kandi ekyo nikibaasika ahabw’okugira ngu naatukunda kandi nitumwikiririzamu n’Omwana we. Yesu akagira ati: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yoh. 3:16) Hariho abantu baingi abaagizire omukago murungi na Yehova. Ka tureebe babiri aharibo.

“ABRAHAMU MUNYWANI WANGYE”

3, 4. Omukago ogu Abrahamu yaabaire aine na Yehova gukaba nigutaana guta n’ogu Abaisraeli baabaire baine nawe?

³ Yehova arikugamba ahari Ishenkuru Abaisraeli, akamugambaho ati: “Abrahamu munywani wangye.” (Isa. 41:8) Ebiri omu 2 Obusingye 20:7 nabyo nibyoreka ngu Abrahamu akaba ari munywani wa Ruhanga. Niki ekyareeteire omushaija ogwo omwesigwa kugira omukago murungi n’Omuhangi we? N’okwikiriza kwe.​—Kut. 15:6; shoma Yakobo 2:21-23.

⁴ Baijukuru ba Abrahamu abaayetsirwe ihanga rya Israeli, omu kubanza Yehova akaba ari nka Ishebo kandi Munywani waabo. Kwonka eky’obusaasi, omukago gwabo na Ruhanga gukaija gwafa. Ahabw’enki? N’ahabw’okugira ngu tibaragumire baine obwesigye omu biraganiso bya Yehova.

5, 6. (a) Okaba ota munywani wa Yehova? (b) Ni bibuuzo ki ebi tushemereire kwebuuza?

⁵ Waaguma nooyega ahari Yehova, noija kweyongyera kumukunda kandi okwikiriza kwawe nikwija kuhama. Ijuka obu waamanya ngu Ruhanga n’owaabuzima kandi ngu noobaasa kugira omukago murungi nawe. Kandi okeega ngu twena nituzaarwa twine ekibi ahabw’obugomi bwa Adamu. Okamanya ngu abantu boona bakaba bataanisiibwe na Ruhanga. (Kol. 1:21) Bwanyima, waamanya ngu Ruhanga waitu ow’omu iguru tari hare naitwe kandi ngu naayenda kutuhwera. Obu waamanya ebirikukwata aha kitambo kya Yesu kandi okakiikiririzamu, nibwo waatandika kugira omukago na Ruhanga.

⁶ Waateekateeka ahari ebyo byona noobaasa kwebuza oti: ‘Ninyeyongyera kugira omukago murungi na Ruhanga? Ninyesigira kimwe Munywani wangye Yehova kandi ninyeyongyera kumukunda buri izooba?’ Omuntu ondiijo owa ira owaabaire aine omukago murungi na Yehova ni Gideoni. Ka tushwijume ebirikumukwataho kandi tureebe eki turikumwegaho.

YEHOVA N’OW’OBUSINGYE

7-9. (a) Ni bintu ki eby’omutaano ebyahikire ahari Gideoni, kandi hakarugamu ki? (Reeba ekishushani aha kutandika.) (b) Nitubaasa kugira tuta omukago na Yehova?

⁷ Omuramuzi Gideoni akaheereza Yehova omu bwire bugumire bwanyima y’Abaisraeli kutaaha omu Nsi Eyaaraganisiibwe. Abaramuzi eshuura 6 neeyoreka ngu maraika wa Yehova akataayaayira Gideoni omuri Ofura. Omu bwire obwo Abamidiani bakaba bari abazigu b’Abaisraeli. Ahabw’enshonga egi, Gideoni akaba naahuura engano omu inyuukiro rya viinyo ahu yaabaire naabaasa kurahuka kugishereka. Gideoni akatangaara obu maraika yaamweyoreka akamweta “omushaija w’amaani emanzi.” N’obu kiraabe kiri kityo, Gideoni akabangaanisa yaaba Yehova owaacungwire Abaisraeli kuruga Misri yaabaire naija kubahwera hati. Maraika arikukora nk’omugambirizi wa Yehova, akagambira Gideoni ngu Yehova buzima naija kumuhwera.

⁸ Gideoni akaba naateekateeka oku yaabaire naabaasa kucungura “Abaisraeli omu mikono y’Abamidiani.” Yehova akamugarukamu ati: “Buzimazima ndyaba ndi hamwe naiwe, naiwe oryabinga Abamidiani nk’orikubinga omuntu omwe.” (Bar. 6:11-16) Kwonka nabwo, Gideoni akaba naakibanganisa oku ekyo kyabaire nikiija kubaho, atyo yaashaba akamanyiso. Omu kugaaniira okwo hatariho kubanganisa Gideoni akatwara Yehova nk’owaabuzima.

⁹ Ebyabaireho bikahamya okwikiriza kwa Gideoni kandi yaabaasa kwirira haihi Ruhanga. Gideoni akateeka eby’okurya kandi yaagaburira maraika. Eby’okurya ku byayokiibwe omuriro omu muringo gw’eky’okutangaaza bwanyima ya maraika kubikozaho enkoni ye, Gideoni akeetegyereza ngu maraika naajwekyera Yehova. Gideoni akatangaara ati: “Ntoore hi, Mukama RUHANGA, ahakuba naareebana na maraika wa MUKAMA butunu!” (Bar. 6:17-22) Mbwenu shi okureebana na maraika kikashiisha omukago gwe na Yehova? Ngaaha buzima! Ekyo kikareetera Gideoni kumanya gye Yehova kandi yaagira obusingye nawe. Eki nitukimanyira aha iziina “Yehova-shaloomu” eri Gideoni yaayetsire eitambiro eri yaayombekiire Yehova. Eiziina eryo omu Ruheburaayo nirimanyisa ngu Yehova N’ow’Obusingye. (Shoma Abaramuzi 6:23, 24) Twateekateeka munonga aha birungi ebi Yehova arikutukorera buri izooba, nitwetegyereza ngu ni Munywani waitu owaabuzima. Okumushaba butoosha nikitureetera kuhurira twine obusingye nawe kandi kyongyera kuhamya omukago gwaitu nawe.

“N’OHA ORIRAARA OMU IHEMA” RYA YEHOVA?

10. Kurugiirira ahari Zaaburi 15:3, 5, Yehova naayenda ngu tukore ki kubaasa kuba banywani be?

¹⁰ Kwonka Yehova kubaasa kutunywana, twine kugira ebi twahikiiriza. Nk’oku kirikworekwa omu Zaaburi 15, Daudi akooreka eki twine kukora kubaasa ‘kuraara omu ihema’ rya Yehova, ekirikumanyisa okuba munywani wa Ruhanga. (Zab. 15:1) Ka tute omutima aha bintu bibiri ebi twine kukora, okwetantara kubeiherera abandi n’okuba omwesigwa omu bintu byona. Daudi akagamba aha muntu oshemereire kuraara omu ihema rya Yehova ati: ‘Tabeiherera bandi na rurimi rwe, . . . n’obu kwakuba okurya enguzi.’​—Zab. 15:3, 5.

11. Ahabw’enki tushemereire kwetantara kubeiherera abandi?

¹¹ Daudi akarabura ati: “Zibira orurimi rwawe kugamba ebibi.” (Zab. 34:13) Twaba tutoorobeire obuhabuzi obwo, nikibaasa kututaanisa na Tataitwe ow’omu iguru. Okubeiherera abandi ni gumwe aha mitwarize ya Sitaane omuzigu wa Yehova. Ekigambo “Omuregi” nikiruga omu kigambo ky’Orugriika ekirikumanyisa “okubeiherera.” Twayegyendesereza omu bi turikugamba aha bandi, nikituhwera kurinda omukago gwaitu na Yehova. Na munonga twine kugira emiteekateekyere mirungi aha b’eishe-emwe abaine obujunaanizibwa omu kibiina.​—Shoma Abaheburaayo 13:17; Yuda 8.

12, 13. (a) Ahabw’enki twine kuba abeesigwa omu bintu byona? (b) Obwesigwa bwaitu nibubaasa kukwata buta aha bandi?

¹² Abaheereza ba Yehova nibamanywa ahabw’okuba abeesigwa. Entumwa Paulo akahandiika ati: “Mutushabire ahakuba nitumanya ngu twine omutima ogutarikweshinja, nitwetenga kutwaza gye omuri byona.” (Heb. 13:18) Ahabw’okugira ngu tumariire kuba abeesigwa omu bintu byona, nitwetantara kuryangatanisa ab’eishe-emwe bagyenzi baitu. Nk’eky’okureeberaho, ow’eishe-emwe yaaba naakukorera oine kumutwariza gye kandi okamushashura nk’oku mwaragaine. Abakristaayo baine kuba abeesigwa ahari abo abarikubakorera hamwe n’abandi. Kandi twaba nitukorera Omukristaayo mugyenzi waitu, titwine kuteekateeka ngu aine kututwariza omu muringo gw’omutaano.

¹³ Abantu baingi omu nsi nibakira kusiima Abajurizi ba Yehova ahabw’obwesigwa bwabo. Nk’eky’okureeberaho, orikwebembera ekitongore ekirikukora aha by’okwombeka akeetegyereza ngu Abajurizi ba Yehova nibahikiiriza ebigambo byabo. “Butoosha nimuhikiiriza ebi murikuragaanisa kukora,” nikwo yaagizire. (Zab. 15:4) Okutwaza omu muringo nk’ogwo nikituhwera kuguma twine omukago murungi na Yehova. Kandi nikimuhimbisisa.

HWERA ABANDI KUBA BANYWANI BA YEHOVA

14, 15. Omu kubuurira kwaitu, nitubaasa kuhwera tuta abantu boona kuba banywani ba Yehova?

¹⁴ N’obu abantu abu turikubuurira baraabe nibaikiriza ngu Ruhanga ariho, abaingi tibarikumutwara nka Munywani waabo. Nitubaasa kubahwera tuta? Reeba eki Yesu yaagambiire abeegi be 70 obu yaabohereza babiri babiri kuza kubuurira. Akabagira ati: “Enju yoona ei muraataahemu, mubanze mugire muti: Obusingye bugume omu nju egi! Ku muraashangyemu omwana w’obusingye, obusingye bwanyu nibwija kuguma ahariwe; kwonka ku kiraabe kitari kityo, obusingye bwanyu nibwija kubagarukira.” (Luk. 10:5, 6) Nitubaasa kuhwera abantu kukunda amazima twabatwariza omu muringo gwa rukundo. Abarikutuhakanisa twabatwariza omu muringo gwa rukundo, nikibaasa kubahwera kwikaikana kandi nibabaasa kuhurikiza aha murundi ogundi twababuurira.

¹⁵ Twabuurira abarikwetwara nk’abanyadiini nari abarikwikiriza enyikiriza zitari mu byahandiikirwe, nitubatwariza omu muringo murungi kandi ogw’obusingye. Abo abatamirwe embeera eziri omu nsi nitubeeta kwija omu nteerane zaitu kandi tubahwera kugira ekyetengo ky’okwega ebirikukiraho ahari Ruhanga ou turikuramya. Ebicweka ebiine omutwe “Baibuli neehindura emitwarize y’abantu” birimu bingi ebirikukwata aha bantu nk’abo.

OKUKORA HAMWE NA MUNYWANI WAITU ORIKUKIRAYO

16. Nituhinduka tuta banywani ba Yehova kandi “abakozi” bagyenzi be?

¹⁶ Abantu baaba nibakora hamwe nibakira kugira omukago murungi. Abo boona abeehaireyo ahari Yehova kumuheereza baine omugisha gw’okwetwa banywani be kandi “abakozi” bagyenzi be. (Shoma 1 Abakorinso 3:9, NW.) Twaba nitwejumba omu murimo gw’okubuurira n’okuhindura abantu abeegi, nitweyongyera kumanya gye emitwarize ya Tataitwe ow’omu iguru. Nitureeba oku omwoyo gwe gurikwera gurikutuhwera kuhikiiriza obujunaanizibwa bwaitu obw’okubuurira amakuru marungi.

17. Eby’okurya by’omwoyo ebi turikutunga aha nteerane empango nibyoreka bita ngu Yehova ni Munywani waitu?

¹⁷ Oku turikweyongyera kwejumba omu murimo gw’okubuurira, nikwo turikweyongyera kugira omukago murungi na Yehova. Nk’eky’okureeberaho, nitureeba oku Yehova arikuremesa abarikutuhakanisa omu kubuurira. Ijuka ebibaireho omu myaka ey’enyima. Nitureeba oku atwire naatuha obuhabuzi n’oku atwire naatwegyesa kurabira omu nteerane zaitu n’ebitabo byaitu. Enteerane zaitu empango nizooreka ngu Tataitwe naayetegyereza oburemeezi bwaitu n’ebi turikwetenga. Ab’eka emwe bakahandiika ebaruha barikusiima oruteerane oruhango. Bakagira bati: “Ebyagambirwe byona bikatukwataho munonga. Tukareeba ngu Yehova buzima naatukunda kandi ngu naafayo aha buri omwe ahariitwe.” Bwanyima y’okuza aha ruteerane ruhango orw’omutaano omuri Ireland, omushaija n’omukazi we kuruga Germany bakooreka okusiima kwabo ahabw’okubaakiira gye n’okubareeberera kandi bakagira bati: “Nitusiima munonga Yehova n’Omugabe Yesu Kristo. Bakatweta kuba hamwe n’abantu aba abaine obumwe. Titurikugamba aha kukwatanisa kw’ebiro bikye byonka, beitu nikubaho buri izooba. Ebi twareebire n’ebi twahuriire aha ruteerane orwo orw’omutaano omuri Dublin nibiija kuguma nibitwijutsya omugisha ogu twine kuheereza Ruhanga hamwe naimwe.”

ABANYWANI NIBAGAANIIRA

18. Nitubaasa kwebuuza ki aha bikwatiraine n’okugaaniira kwaitu na Yehova?

¹⁸ Omukago niguhama haaba hariho okugaaniira. Okutunga abanywani kurabira aha mukura n’okwohererezana obutumwa, bijanjaire munonga omu bunaku obu obwa Intaneeti n’entunguuka omu by’empurizana. Kwonka, omuringo ogwo titurikubaasa kugugyeragyeranisa n’okugaaniira na Munywani waitu orikukirayo Yehova. Buzima ‘naahurira okushaba’ kwaitu. (Zab. 65:2) Mbwenu shi nituteeraho kumushaba?

19. Ni buhwezi ki obu twine twaba nitugumirwa kugambira Yehova ebi turi aha mutima?

¹⁹ Abaheereza ba Ruhanga abamwe tikirikuboorobera kumugambira ebi bari aha mutima byona. Kwonka, Yehova naayenda ngu tumugambire ebi turi aha mutima twaba nitushaba. (Zab. 119:145; Tonz. 3:41) N’obu kiraabe kigumire kworeka enyehurira zaitu omu bigambo, twine obuhwezi. Paulo akahandiikira Abakristaayo omuri Rooma ati: “Titumanya kushaba nk’oku kitushemereire.” Kwonka omwoyo gwe niguhwera omu kutsinda oku omuntu atarikubaasa kugamba. ‘Kandi Ogwo, ocaaka emitima y’abantu, amanya ebi omwoyo guteekateeka, ku gutonganira abarikwera, nk’oku Ruhanga akunda.’ (Rom. 8:26, 27) Okuteekateeka aha bigambo ebiri omu bitabo bya Baibuli nka Yobu, Zaaburi na Enfumu nibiija kutuhwera kugambira Yehova ebituri aha mutima.

20, 21. Ebiri omu Abafilipi 4:6, 7 nibituhuumuriza bita?

²⁰ Twaba twine amaganya, ka tuteereho kwijuka ebigambo bya Paulo ebi yaahandiikiire Abafilipi: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime.” Twashaba Yehova omu muringo nk’ogwo nituhuumurizibwa. Paulo akongyeraho ati: “Obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu omuri Kristo Yesu.” (Fil. 4:6, 7) Ka tugume tusiime “obusingye bwa Ruhanga” oburikurinda emitima yaitu n’ebiteekateeko byaitu.

²¹ Okushaba nikutuhwera kugira omukago murungi na Yehova. N’ahabw’ekyo ka tugume ‘tushabe obutoosha.’ (1 Tes. 5:17) Ka tuteereho kuhamya omukago gwaitu na Yehova n’okukora ebi akunda. Kandi ka tuteereho kugira obwire bw’okuteekateeka munonga aha migisha ei twine ahabw’okugira ngu Yehova buzima ni Tataitwe, ni Ruhanga waitu kandi ni Munywani waitu.