Obumanzi bwa Yehoyaada

Yezebeeli akaba aine omuhara orikwetwa Atalia, owaabaire ari mubi munonga nka nyina. Atalia akashwerwa omugabe wa Yuda. Iba ku yaafiire, omutabani akatandika kutegyeka. Kwonka omutabani ku yaafiire, Atalia akeehindura omutegyeki wa Yuda. Bwanyima akateeraho kucwekyereza orunyiriri rw’abagabe, arikwita buri omwe owaabaire naabaasa kuba omugabe omu mwanya gwe, otwariiremu n’abaijukuru. Buri omwe akaba naamutiina.

Omunyamurwa Omukuru Yehoyaada n’omukazi we, Yehosheba, bakaba nibamanya ngu ebi Atalia yaabaire naakora bikaba biri bibi munonga. Bakata amagara gaabo omu kabi kubaasa kushereka mwijukuru wa Atalia, omwereere owaabaire naayetwa Yoasi. Bakamukuriza ahari hekalu.

Yoasi ku yaahikize emyaka mushanju, Yehoyaada akarundaana abakuru n’Abaleevi boona yaabagira ati: ‘Murinde emiryango ya hekalu, kandi mutaikiriza omuntu weena kutaahamu.’ Bwanyima Yehoyaada yaahindura Yoasi omugabe wa Yuda yaamuta ekirunga aha mutwe. Abantu ba Yuda bakateera orwari nibagira bati: ‘Karamaare omugabe!’

Omugabekazi Atalia akahurira abantu nibateera orwari yairuka yaaza aha hekalu. Ku yaareebire omugabe musya, akarira naagira ati: “Okwebumba! Okwebumba!” Abakuru bakakwata omugabekazi mubi ogwo, baamutwara baamwita. Kwonka shi ebikorwa bye bibi ebyareeteire ihanga ryona kushiisha?

Yehoyaada akahwera eihanga eryo kukora endagaano na Yehova baraganisa kuba niwe baaramya wenka. Yehoyaada akaragiira abantu kusheenya nyaruju ya Baali n’okwatagura ebishushani. Akataho abanyamurwa n’Abaleevi kukora ahari hekalu kugira ngu abantu babaase kugaruka kuramya Yehova. Akataho abarinzi kurinda hekalu kugira ngu omuntu weena otashemeire omu maisho ga Yehova atakaatahamu. Bwanyima Yehoyaada n’abakuru bakataasya Yoasi omuri nyaruju y’omugabe baamuta aha kitebe ky’obugabe. Abantu ba Yuda bakashemererwa. Bakaba nibabaasa kuheereza Yehova, batarikuramya Baali kandi batarikuteganisibwa Atalia. Waayetegyereza oku obumanzi bwa Yehoyaada bwahwereire abantu baingi?