Ebirikwanjura Ekicweka 9

Ekicweka eki nikitwegyesa aha baana, baanabi, n’abagabe abaayorekire ngu nibaikiririza kimwe omuri Yehova. Omuri Siria, omwishiki muto Omwisraeli akaba naikiriza ngu nabi wa Yehova akaba naabaasa kukiza Naamani. Nabi Elisa akaba naayesigira kimwe ngu Yehova naija kumurinda abazigu. Omunyamurwa omukuru Yehoyaada akata amagara ge omu kabi kubaasa kurinda Yoasi obu yaabaire ari muto kuruga ahari nyinenkuru Atalia owaabaire ari mubi. Omugabe Hezekia akeesiga ngu Yehova naija kucungura Yerusaalemu, kandi taratiinire okutiinatiinisa kw’Abasiria. Omugabe Yosia akaihaho okuramya ebishushani omu ihanga ryona yaagaruraho hekalu, n’okuramya okw’amazima.