Maraika wa Yehova Akarinda Hezekia

Obutegyeki bwa Asiria bukaba butwire obugabe bw’enganda ikumi za Israeli. Kandi Senakeribu, omugabe wa Asiria, akaba naayenda kutwara obugabe bw’enganda ibiri za Yuda. Akatandika kutwara endembo za Yuda rumwe aha rundi. Kwonka orurembo oru yaabaire naayenda munonga n’orwa Yerusaalemu. Senakeribu akaba atarikumanya ngu Yehova akaba naarinda Yerusaalemu.

Hezekia, omugabe wa Yuda, akashashura Senakeribu esente nyingi ngu abaase kureka Yerusaalemu. N’obu Senakeribu araabe yaatwire sente ezo, akaguma naayohereza eihe rye ry’amaani kutaahiirira Yerusaalemu. Abantu b’omu rurembo bakaba batiinire ahakuba Abaasiria bakaguma nibeyongyera kwirira haihi. Hezekia akabagira ati: ‘Mutatiina. Abaasiria baine amaani, kwonka Yehova naija kutuha amaani agarikukira agaabo.’

Senakeribu akoohereza omutware we Rabushaake, kuza Yerusaalemu kutiinatiinisa abantu baayo. Rabushaake akeemerera aheeru y’orurembo yaagamba omu iraka rihango naagira ati: ‘Yehova tarikubaasa kubahwera. Mutaikiriza Hezekia kubabeiha. Tihariho ruhanga orikubaasa kubajuna omu mikono yaitu.’

Hezekia akashaba Yehova kumuhwera kumanya eki ashemereire kukora. Yehova akamugarukamu ati: ‘Otatiina ebyo bigambo bya Rabushaake. Senakeribu tarikwija kutwara Yerusaalemu.’ Ekyakuratsireho, Hezekia akatunga ebaruha kuruga ahari Senakeribu. Ebaruha zikaba nizigira ziti: ‘Mugarukane naanye. Yehova tarikubaasa kubajuna.’ Hezekia akashaba ati: ‘Yehova, ninkweshengyereza otujune, abantu boona bamanye ku niiwe wenka Ruhanga ow’amazima.’ Yehova akamugira ati: ‘Omugabe wa Asiria tarikuza kwija omuri Yerusaalemu. Niinyija kurinda orurembo rwangye.’

Senakeribu akaba naamanya ngu juba naija kutwara Yerusaalemu. Kwonka omu kiro kimwe, Yehova akoohereza maraika we ahu abaserukare baabaire bateire orusiisira aheeru y’orurembo. Maraika ogwo akaita abaserukare 185,000. Omugabe Senakeribu akafeerwa abaserukare be ab’amaani. Akaba ataine kindi eki arikubaasa kukora kureka kugaruka owaabo. Yehova akarinda Hezekia na Yerusaalemu, nk’oku yaabaire araganiise. Kuri waabaire ori omuri Yerusaalemu, okaba noija kwesiga Yehova?