Ezera Akeegyesa Ebiragiro bya Ruhanga

Hakaba haahingwireho emyaka nka 70 kuruga obu Abaisraeli abamwe baagaruka Yerusaalemu, kwonka abandi bakaba nibakituura omu bicweka bimwe by’obugabe bwa Buperesi. Omwe aharibo akaba ari omunyamurwa orikwetwa Ezera, owaayegyeise Ebiragiro bya Yehova. Ezera akamanya ngu abantu omuri Yerusaalemu bakaba batarikugyendera aha Biragiro, kandi akaba naayenda kuza kubahwera. Omugabe Arutagizakiseesi owa Buperesi akamugira ati: ‘Ruhanga akakuha obwengye kugira ngu oyegyese ebiragiro bye. Irooko, otware weena orikwenda kugyenda naiwe.’ Ezera akateeranira hamwe boona abaabaire nibenda kugaruka Yerusaalemu. Bakashaba Yehova kubarinda omu rugyendo rwabo, batyo baagyenda.

Bwanyima y’ameezi ana, bakahika Yerusaalemu. Abanyiginya bakagira Ezera bati: ‘Abaisraeli baagomeire Yehova kandi baashwera abakazi abarikuramya baaruhanga b’ebishuba.’ Ezera akakora ki? Omu maisho g’abantu, Ezera akatsimba amaju yaashaba naagira ati: ‘Yehova, otukoreire bingi, kwonka tusiisire.’ Abantu bakeeteisa, kwonka bakagumizamu nibakikora ebintu bibi. Ezera akatoorana abareeberezi n’abaramuzi kutebeekanisa enshonga ezo. Ku haahingwireho ameezi ashatu, abaabaire batarikuramya Yehova bakabingwa.

Hakahinguraho emyaka ikumi n’ebiri. Omu bunaku obwo, engo za Yerusaalemu zikagaruka zaayombekwa. N’ahabw’ekyo Ezera akateeranira hamwe abantu kubashomera Ebiragiro bya Ruhanga. Ezera ku yaashuurwire ekitabo, abantu baimuka. Akahimbisa Yehova, kandi boona baimutsya emikono barikwikirizana. Bwanyima Ezera akashoma kandi yaashoboorora ebiragiro, kandi abantu bakahurikiriza gye. Bakaikiriza ngu bakaba barugire ahari Yehova ogundi murundi, kandi bakarira. Ekiro ekyakuratsireho, Ezera akoongyera yaabashomera Ebiragiro ebindi. Bakamanya ngu juba baine kugira Obugyenyi bw’Ensiisira. Ahonaaho, bakatandika kutebeekanisa obugyenyi obwo.

Omu biro mushanju by’obugyenyi, abantu bakashemererwa kandi baasiima Yehova ahabw’okushaaruura bingi. Hakaba hatakabahoga Obugyenyi bw’Ensiisira nk’obwo kuruga omu bunaku bwa Yoshua. Bwanyima y’obugyenyi, abantu bakeeteeranira hamwe bashaba bati: ‘Yehova, okatujuna waatwiha omu buhuuku, waaturiisa turi omu ihamba, waatuha ensi nungi egi. Kwonka emirundi mingi, tukakugomera. Okoheereza baanabi kuturabura, kwonka titwahurira. Kwonka, okatugumisiriiza. Okarinda endagano yaawe na Abrahamu. Hati nituraganisa ngu nitwija kukworobera.’ Abaisraeli bakahandiika okuraganisa kwabo, kandi Abaleevi, abanyiginya n’abanyamurwa bakakuhamya n’akamanyiso.