Noobaasa Kuguma Oine Obwesigye omu Mbeera Zigumire

1-2. (a) Embeera ezi turimu hati nizishushana zita n’ez’Abayudaaya abaagarukire Yerusaalemu? (b) Abayudaaya bakatunga buremeezi ki? (Reeba akabokusi “Ebyabaireho omu Biro bya Hagai, Zekaria na Ezera.”)

OBUMWE nooyerarikirira aha biro by’omumaisho? Noobaasa kuba ofeereirwe omurimo gwawe kandi nooyerarikirira oku oraareeberere eka yaawe. Noobaasa kuba nooyerarikirira aha burinzi bw’eka yaawe ahabw’obutabanguko omu by’obutegyeki, nari okuhakanisibwa kw’omurimo gwaitu gw’okubuurira. Waahikirweho emwe aha mbeera ezo? Kyaba nikwo kiri, nooza kugasirwa omu kureeba oku Yehova yaahweraire Abaisraeli ira obu baahikwaho embeera nizo zimwe.

² Kikaba nikyetengyesa okwikiriza, Abayudaaya abaabaire nibatuura omuri Babulooni kutsigaho embeera nungi bakaza omu ihanga eri baabaire batarikwetegyereza gye. Ku baahikireyo, bakatunga oburemeezi omu by’entaatsya kandi bakateganisibwa obutabanguko bw’eby’obutegyeki otwariiremu n’okuhakanisibwa. Ahabw’enshonga egyo abamwe bakagumirwa kuta omutima aha kugaruka kwombeka hekalu ya Yehova. N’ahabw’ekyo, nk’omu gwa 520 Y.A., Yehova akoohereza nabi Hagai na Zekaria, kuhwera abantu kugaruka kugira omujinya. (Hag. 1:1; Zek. 1:1) Nk’oku turikuza kureeba, okuhiga kwa baanabi abo kukarugamu ebirungi. Kwonka bwanyima y’emyaka nka 50, omujinya gw’Abayudaaya gukagaruka gwatuuba. Ezera, owaabaire ashongokire omu kukopoorora ebiragiro, akaruga Babulooni yaaza Yerusaalemu kuhiga abaheereza ba Ruhanga kwebembeza okuramya okw’amazima.​—Ezr. 7:1, 6.

3. Nituza kushwijuma bibuuzo ki? (Enfumu 22:19)

³ Nk’oku obunabi bwa Hagai na Zekaria bwahweraire abantu ba Ruhanga ira kugumizamu nibamwesiga obu baabaire nibahakanisibwa, obunabi obwo nibubaasa kutuhwera omu bunaku obu kugumizamu nitwesiga Yehova n’obu twakuhikwaho embeera zigumire. (Shoma Enfumu 22:19.) Twaba nitushwijuma obutumwa obu Ruhanga yaahaire Abayudaaya arikukoresa Hagai na Zekaria, n’eky’okureeberaho kya Ezera, nituza kugarukamu ebibuuzo ebi: Abayudaaya abaagarukire Yerusaalemu bakakwatwaho bata oburemeezi obu baashangireyo? Ahabw’enki twine kugumizamu nitukora ebi Ruhanga arikukunda n’obu twakuhikwaho embeera ezigumire? Kandi, nitubaasa kwongyera tuta kugira obwesigye omuri Yehova twaba twine oburemeezi?

OKU OBUREMEEZI BWATUUBIZE OBWEZIRIKI BW’ABAYUDAAYA ABAAGARUKIRE YERUSAALEMU

4-5. Niki ekirikubaasa kuba kyatuubize omujinya gw’Abayudaaya ogw’okwombeka Hekalu?

⁴ Abayudaaya abaagarukire Yerusaalemu bakaba baine bingi by’okukora. Omu bwire bukye bakagaruka bayombekyera Yehova eitambiro, kandi bataho omusingi gwa hekalu. (Ezr. 3:1-3, 10) Kwonka omujinya ogu baabaire baine omu kubanza gukatuuba. Ahabw’enki? Oyihireho omurimo gw’okwombeka hekalu, bakaba baine kwombeka amaju gaabo, kuhinga emisiri, n’okureeberera ab’amaka gaabo. (Ezr. 2:68, 70) Kandi, bakahakanisibwa abazigu baabo, abaabaire nibacuma enaama y’okwemereza omurimo gw’okugaruka kwombeka hekalu.​—Ezr. 4:1-5.

⁵ Abayudaaya abaagarukire Yerusaalemu bakateganisibwa n’embeera mbi ez’eby’entaatsya n’ez’eby’obutegyeki. Eihanga ryabo rikaba riri omu butware bwa Buperesi. Omugabe Kuuro owa Buperesi ku yaafiire omuri 530 Y.A., Omugabe Cambyses owaamuhunguriire akeebembera eihe eryagiire kurwanisa Misri. Ku baabaire nibaza kurwanisa Misri, abaserukare be nibabaasa kuba bashabire Abaisraeli eby’okurya, amaizi n’oburaaro, ekyareeteire embeera y’Abaisraeli kwongyera kuguma. Obu Dario I owaahunguriire Cambyses yaatandika kutegyeka, hakaba hakiriho oburemeezi omu by’obutegyeki omu butware bwa Buperesi. Hatariho kubangaanisa, embeera ezi nizibaasa kuba zaareetaire Abayudaaya baingi kwerarikirira oku baabaire nibabaasa kureeberera amaka gaabo. Ahabw’oburemeezi obwo, Abayudaaya abamwe bakateekateeka ngu bukaba butari bwire burungi kwombeka Hekalu ya Yehova.​—Hag. 1:2.

6. Kurugiirira ahari Zekaria 4:6, 7, Abayudaaya bakahikwaho buremeezi ki obundi, kandi Zekaria akabahamiza ki?

⁶ Shoma Zekaria 4:​6, 7. Oyihireho oburemeezi omu by’entaatsya n’obutabanguko omu by’obutegyeki, Abayudaaya bakaba baine n’okwemera okuhiiganisibwa. Omuri 522 Y.A., abazigu baabo bakabaasa kwemereza omurimo gw’okugaruka kwombeka hekalu ya Yehova. Kwonka Zekaria akahamiza Abayudaaya ngu Yehova akaba naija kukoresa omwoyo gurikwera kwihaho byona ebyabaire nibibaasa kubaremesa. Omuri 520 Y.A., Omugabe Dario akaikiriza Abayudaaya kugaruka kwombeka hekalu, yaabaha esente z’okubahwera, kandi yaaragiira abakungu b’ekicweka ekyo kubashagika.​—Ezr. 6:1, 6-10.

7. Abayudaaya abaagarukire Yerusaalemu ku baataire omutima aha kukora ebi Ruhanga arikukunda, bakatunga migisha ki?

⁷ Yehova arikukoresa Hagai na Zekaria, akaraganisa abantu be ngu naija kubashagika baata omutima aha kugaruka kwombeka hekalu. (Hag. 1:8, 13, 14; Zek. 1:3, 16) Abayudaaya bakabaasa kugaruka kukora omurimo gw’okwombeka hekalu omuri 520 Y.A., ahabw’okugira ngu baanabi bakabagumya, kandi omurimo ogwo bakaguheza emyaka etaano etakahikire. Ahabw’okugira ngu Abayudaaya bakata omutima aha kukora ebi Ruhanga arikukunda n’omu bwire bw’oburemeezi, akabaasa kubashagika ti mu by’omubiri byonka kureka n’omu by’omwoyo. N’ekyarugiremu, bakaramya Yehova baine okushemererwa.​—Ezr. 6:14-16, 22.

GUMA OTAIRE OMUTIMA AHA KUKORA EBI RUHANGA ARIKUKUNDA

8. Ebiri omuri Hagai 2:4 nibibaasa kutuhwera bita kuta omutima aha kukora ebi Ruhanga arikukunda? (Reeba n’obugambo obw’ahansi.)

⁸ Obu okubonabona kwingi kuri haihi kuhika, ni kikuru kumanya ngu twine kwejumba omu murimo gw’okubuurira okukira obundi bwona. (Mak. 13:10) Kwonka, nitubaasa kugumirwa kuta omutima aha buheereza bwaitu, twaba twine oburemeezi omu by’entaatsya nari omurimo gwaitu gw’okubuurira gwaba niguhakanisibwa. Niki ekirikubaasa kutuhwera kwebembeza eby’Obukama? N’okuguma twine obwesigye ngu “[Yehova] ow’amahe”b ari aha rubaju rwaitu. Naija kutushagika twagumizamu nitwebembeza eby’Obukama omu mwanya gw’ebyaitu. N’ahabw’ekyo tihaine ekishemereire kututiinisa.​—Shoma Hagai 2:4.

9-10. Omushaija n’omukazi we bakareeba bata okuhikiirira kw’ebigambo bya Yesu ebiri omu Matayo 6:33?

⁹ Teekateeka aha ky’okureeberaho kya Oleg n’omukazi we Irina,c abari baapayoniya. Ku baagiire kuhwera ekibiina omu mwanya ogundi, bakafeerwa omurimo gwabo ahabw’embeera z’eby’entaatsya kwongyera kuba mbi omu ihanga ryabo. N’obu baraabe baabaire bataine murimo gw’obutwire kumara nk’omwaka, butoosha bakaba bareeba oku Yehova yaabaire naabashagika, kandi obumwe bakaba bahwerwa ab’eishe-emwe na banyaanyazi-itwe. Bakaraba bata omu mbeera ezo ezaabaire zigumire? Omu kubanza, Oleg akagira amaganya, naagira ati: “Okuguma nitwehenega omu murimo gw’okubuurira kikatuhwera kuta omutima aha bintu ebikuru.” N’obu we n’omukazi we baagumiizemu ni basherura omurimo, bakaguma bari abeeziriki omu buheereza.

¹⁰ Eizooba rimwe ku baagarukire omu ka barikuruga kubuurira, bakashangayo enshaho ibiri z’eby’okurya ezaabareeteirwe munywani waabo ow’aha mara owaagyenzire orugyendo nk’orwa mahiro 100. Oleg naagira ati: “Eizooba eryo, tukagaruka twareeba oku Yehova n’ekibiina kye barikutufaho. Nituhamya ngu Yehova tarikwebwa baheereza be, n’obu barikuba nibaraba mu mbeera ki.”​—Mat. 6:33.

11. Nitubaasa kugira bwesigye ki twata omutima aha kukora ebi Ruhanga arikukunda?

¹¹ Yehova naayenda ngu tute omutima aha murimo gw’okujuna abantu turikubahindura abeegi. Nk’oku kyagambwaho omu kacweka ka 7, Hagai akahiga abantu ba Yehova kuta omutima aha by’omwoyo, orikushusha ngu bariyo nibagaruraho omusingi gwa hekalu. Kuri baakozire ekyo, Yehova akaba naija “kubaha omugisha.” (Hag. 2:18, 19) Nitubaasa kugira obwesigye ngu Yehova naija kutuha emigisha twata omutima aha kukora omurimo ogutuhairwe.

OKWONGYERA KUTA OBWESIGYE OMURI YEHOVA

12. Ahabw’enki Ezera n’Abayudaaya abaagarukire Yerusaalemu baabaire baine kugira okwikiriza kuhami?

¹² Omu mwaka 468 Y.A., Ezera akagyenda na guruupu ya kabiri y’Abayudaaya kuruga Babulooni barikuza Yerusaalemu. Ezera n’abu yaabaire aine bakaba baine kugira okwikiriza kuhamire, kubaasa kugyenda orugyendo orwo. Bakaba nibaija kugyendera omu nguuto mbi, beekoreire ezaabu nyingi n’efeeza ezaabaire zihairweyo ahabw’omurimo gwa hekalu. N’ahabw’ekyo bakaba nibabaasa kutaahirirwa abashuma. (Ezr. 7:12-16; 8:31) Kandi, bakaba nibareeba Yerusaalemu hatariyo burinzi. Orurembo rukaba rurimu abantu bakye, kandi engo n’amarembo bikaba biine kuhunduuzibwa. Nitubaasa kwegyera ki ahari Ezera aha bikwatiraine n’okwongyera kugira obwesigye omuri Yehova?

13. Niki ekyahweraire Ezera kuhamya obwesigye bwe omuri Yehova? (Reeba n’obugambo obw’ahansi.)

¹³ Ezera akaba yaareebire oku Yehova yaashagikire abantu be omu bwire bw’okugyezibwa. Emyaka y’enyima omuri 484 Y.A., Ezera naabaasa kuba yaabaire naatuura omuri Babulooni obu Omugabe Ahasuero yaataho ekiragiro ky’okucwekyereza Abayudaaya boona omu butware bwa Buperesi. (Est. 3:7, 13-15) Ezera akaba ari omu kabi! Abayudaaya “omu mashaza goona” bakeesiibyakwo kandi baaborooga, obundi barikutakira Yehova omu kushaba kubaha obuhabuzi ahabw’akabi akaabaire nikaza kubahikaho. (Est. 4:3) Teekateeka aha ku Ezera n’Abayudaaya bagyenzi be bayehuriire, abaabaire bakozire orukwe rw’okubacwekyereza ku baabaire nibo baitwa! (Est. 9:1, 2) Ebi Ezera yaarabiremu omu bwire obwo obugumire bikamutebeekanisiza okugyezibwa okwabaire nikwija kubaho omu biro by’omumaisho, kandi byamuhwera kugira obwesigye ngu Yehova naabaasa kuhwera abantu.d

14. Munyaanyazi-itwe omwe akeega eishomo ki ku yaareebire oku Yehova arikumureeberera omu mbeera zigumire?

¹⁴ Yehova ku arikutuhwera omu mbeera zigumire nitwongyera kumwesiga. Teekateeka aha ky’Okureeberaho kya Anastasia, orikutuura omu burugwa-izooba bwa Europe. Akarekura omurimo gwe ahabw’okutenda kugwera orubaju omu by’obutegyeki. Naagira ati: “Nkaba ntakabahoga mu mbeera y’okutagira sente.” Naayongyeraho ati: “Nkareka enshonga omu mikono ya Yehova, reero naareeba oku arikunfaho. Kyabaho nkagaruka nkafeerwa omurimo, tindikwija kutiina. Tata ow’omu iguru ku araabe naabaasa kundeeberera hati, naija kundeeberera nyentsya.”

15. Niki ekyahweraire Ezera kuguma aine obwesigye omuri Yehova? (Ezera 7:27, 28)

¹⁵ Ezera akareeba omukono gwa Yehova. Ezera ku yaateekateekire aha mirundi ei Yehova yaamuhweraire, akoongyera kumutamu obwesigye. Teekateeka aha bigambo ebi: “Omukono gwa [Yehova] Ruhanga wangye gukaba gundiho.” (Shoma Ezera 7:​27, 28.) Ezera akakoresa ebigambo nibyo bimwe emirundi nk’etaano omu kitabo ekirikwetererwa eiziina rye.​—Ezr. 7:6, 9; 8:18, 22, 31.

16. Ni mu mbeera ki obu turikubaasa kureeba gye omukono gwa Ruhanga? (Reeba n’ekishushani.)

¹⁶ Yehova naabaasa kutuhwera twaba nituraba omu mbeera zigumire. Nk’eky’okureeberaho, twashaba mukama waitu orusa rw’okuza omu ruteerane oruhango orw’ebiro bishatu, nari orw’okuba omu nteerane z’ekibiina nituza kureeba omukono gwa Yehova. Nitwija kutangaara kureeba ekiraabeho. N’ekiraarugyemu nitwija kwongyera kugira obwesigye omuri Yehova.

17. Ezera akooreka ata ngu n’omucureezi n’omu mbeera zigumire? (Reeba n’ekishushani ekiri aha kipampagare.)

¹⁷ Ezera akaba omucureezi yaashaba Yehova obuhwezi. Buri murundi ogu Ezera yaabaire aba aine obujunaanizibwa bw’amaani, akaba ashaba Yehova omu bucureezi. (Ezr. 8:21-23; 9:3-5) Ahabw’okugira ngu Ezera akaba aine emitwarize mirungi, kikahiga Abayudaaya bagyenzi be kumushagika n’okugira okwikiriza nk’okwe. (Ezr. 10:1-4) Twayerarikirira munonga aha by’okwebaisaho nari oku turaarinde eka yaitu, twine kushaba Yehova obuhwezi.

18. Niki ekirikubaasa kutuhwera kuhamya obwesigye bwaitu omuri Yehova?

¹⁸ Twaba abacureezi tukashaba Yehova kandi tukaikiriza obuhwezi bw’ab’eishe-emwe bagyenzi baitu, nitwija kwongyera kumwesiga. Erika, nyina w’abaana bashatu, akeesigira kimwe Yehova obu yaafeerwa abantu be. Omu kaire kakye, akafeerwa omwana we atakazairwe na iba ou yaabaire naakunda munonga. Hati naagira ati: “Torikubaasa kumanya oku Yehova araakuhwere. Naabaasa kukuhwera omu miringo ei otarikuteekateeka. Nyetegyereize ngu okushaba kwangye kugarukirwemu kurabira omu bigambo n’ebikorwa bya banywani bangye. Ku ndikugambira banywani bangye oku ndikwehurira, nikiboorobera kumpwera.”

GUMA OINE OBWESIGYE OMURI YEHOVA KUHITSYA AHA MUHERU

19-20. Nitwegyera ki aha Bayudaaya abaabaire batarikubaasa kugaruka Yerusaalemu?

¹⁹ Nitubaasa n’okwegyera eishomo rikuru aha Bayudaaya abatarabaasize kugaruka Yerusaalemu. Abamwe nibabaasa kuba baabaire batarikubaasa kukora bingi obundi ahabwa bukuru, endwara, nari obujunaanizibwa bw’eka. N’obu kiraabe kyabaire kiri kityo, bakeehayo beekundiire kushagika abo abaagarukire Yerusaalemu barikubaha ebirikwetengyesa. (Ezr. 1:5, 6) Nikireebeka ngu, bwanyima y’emyaka nka 19, guruupu y’okubanza eherize kuhika Yerusaalemu, abaagumire Babulooni bakaba nibakyohereza ebiconco Yerusaalemu beekundiire.​—Zek. 6:10.

²⁰ N’obu twakuba tutarikubaasa kukora bingi omu buheereza, nitubaasa kugira obwesigye ngu Yehova naasiima okuteeraho kwaitu kumushemeza. Ekyo nitukimanya tuta? Omu biro bya Zekaria, Yehova akamugambira kukora ekirunga ekiheetsirwe omu zaabu n’efeeza ei Abayudaaya abatsigaire Babulooni baayohereize. (Zek. 6:11) “Ekirunga” ekyo kikaba nikiija kuba “ekiijutsyo” ky’ebi baahaireyo beekundiire. (Zek. 6:14) Naitwe nitubaasa kugira obwesigye ngu Yehova tarikwija kwebwa okuteeraho kwaitu kumuheereza n’omu mbeera zigumire.​—Heb. 6:10.

21. Niki ekirikwija kutuhwera kworekyera ebiro by’omumaisho twine obwesigye?

²¹ Buzima nitwija kuhikwaho embeera zigumire omu biro ebi eby’emperu, kandi nizibaasa kwongyera kuguma omu biro by’omumaisho. (2 Tim. 3:1, 13) Kwonka, titwine kwerarikirira ekirenga. Ijuka ebi Yehova yaagambiire abantu be omu biro bya nabi Hagai. Akagira ati: “Ndi hamwe naimwe . . . mutatiina.” (Hag. 2:4, 5) Naitwe nitubaasa kuhamiza kimwe ngu Yehova naija kuba hamwe naitwe twateeraho nk’oku turikubaasa kukora ebi arikukunda. Twagyendera aha bi twayega omu bunabi bwa Hagai na Zekaria n’eky’okureeberaho kya Ezera, nitubaasa kuguma nitwesiga Yehova n’obu twakuhikwaho embeera zigumire omu biro by’omumaisho.