Obu Yesu Yaabaire Ari Muto

Yosefu na Mariamu bakaba nibatuura omuri Nazareesi na Yesu n’abaana baabo abandi. Yosefu akareeberera eka ye arikukora omurimo gw’okubaija, kandi akabeegyesa ebiragiro bya Yehova. Butoosha, boona nk’eka bakaba baza omu sinagogi kuramya kandi buri mwaka bakaba baza Yerusaalemu aha Kuhingurwaho.

Obu Yesu yaabaire aine emyaka 12, boona nk’eka bakaza Yerusaalemu nka butoosha. Orurembo rukaba rurimu abantu baingi abaabaire baizire aha Kuhingurwaho. Bwanyima, Yosefu na Mariamu bakagaruka omu ka, barikumanya ngu Yesu ari nabo. Kwonka ku baamusherweire omu banyabuzaare, tibamubona.

Bakagaruka Yerusaalemu, baamara ebiro bishatu barikumusherura. Bwanyima, bakamushanga omu hekalu. Yesu akaba ari ahagati y’abeegyesa, ahurikiriize kandi arikubabuuza ebibuuzo. Abeegyesa bakashemererwa munonga baatandika kumubuuza ebibuuzo. Kandi bakatangaara ahabw’ebi yaabagarukiremu. Bakaba nibabaasa kureeba ngu naayetegyereza Ebiragiro bya Yehova.

Yosefu na Mariamu bakaba batiinire munonga. Mariamu akamugira ati: ‘Mwana wangye, tubaire nitukusherura buri hamwe! Obaire orahi?’ Yesu akabagira ati: ‘Timurikumanya ku nshemereire kuba omu nju ya Tata?’

Yesu akagaruka omuka Nazareesi n’abazaire be. Yosefu akeegyesa Yesu omurimo gw’obubaizi. Noogira Yesu akaba ari muntu wa muringo ki obu yaabaire ari omutsigazi muto? Kandi Yesu akongyera kutunga obwengye n’okukura, arikusiimwa Ruhanga n’abantu.