Yesu Akaba Ayorobera Abazaire Be Hamwe na Yehova

Nikikworobera butoosha kworobera abazaire baawe?— Obumwe nikiba kitoorobi. Noomanya ngu Yesu akaba ayorobera abazaire be hamwe na Yehova?— Eky’okureeberaho kye nikibaasa kukuhwera kworobera abazaire baawe n’obu kirikuba kitoorobi. Ka twongyere kwega ebirikumukwataho.

Yesu atakaizire omu nsi, akaba naatuura na ishe, Yehova, omu iguru. Kwonka akaija yaagira abazaire omu nsi. Bakaba nibeetwa Yosefu na Mariamu. Noomanya oku baahindukire abazaire be?—

Yehova akafurura amagara g’Omwana we kuruga omu iguru yaagata omunda ya Mariamu, kugira ngu Yesu abaase kuzaarwa omu nsi. Ekyo buzima kikaba eky’okutangaaza! Yesu akakurira omunda ya Mariamu nk’abandi baana. Bwanyima y’ameezi mwenda, Yesu akazaarwa. Nikwo Mariamu na Yosefu baahindukire abazaire ba Yesu omu nsi.

Yesu ku yaabaire aine emyaka 12, haine eki yaakozire kworeka ngu naakunda ishe, Yehova. Ekyo kikabaho obu Yesu n’abazaire be baabaire bagiire Yerusaalemu aha bugyenyi bw’Okuhingurwaho. Ku baabaire nibagaruka omu ka, Yosefu na Mariamu bakasherura Yesu yaabura. Noomanya ahu yaabaire ari?—

Yosefu na Mariamu ahonaaho bakagaruka Yerusaalemu kumusherura. Bakatiina munonga ahabw’okugira ngu tibaraamubonire. Kwonka bwanyima y’ebiro bishatu, bakamushanga omu hekalu. Noomanya ahabw’enki Yesu yaabaire ari omu hekalu?— N’ahabw’okugira ngu niyo yaabaire naabaasa kwegyera ebirikukwata ahari ishe, Yehova. Akaba naakunda Yehova kandi arikwenda kwega oku yaakubaasa kukora ebirikumushemeza. Kandi n’obu Yesu yaakuzire akaba omushaija, akaguma naayorobera Yehova. Yesu akaba amworobera n’obu kyabaire kiba kitoorobi kandi kirikutwariramu okubonabona. Mbwenu shi Yesu akoorobera Yosefu na Mariamu?— Baibuli neeyoreka ngu akaboorobera.

Yesu noobaasa kumwegaho ki?— Oshemereire kworobera abazaire baawe, n’obu kirikuba kitoorobi obumwe. Noija kuboorobera?—