“Ogu n’Omwana Wangye”

ABAANA ku barikukora ebintu birungi, abazaire nibashemererwa. Omwishiki ku arikukora gye ekintu, ishe nikimushemeza kugambira abandi ati: “Ogu ni muhara wangye.” Nari omwojo ku arikukora ebirungi, ishe nikimushemeza kugira ati: “Ogu ni mutabani wangye.”

Yesu butoosha naakora ebirikushemeza Ishe. N’ahabw’ekyo Ishe naamwesiimisa. Noijuka eki Ishe Yesu yaakozire izooba rimwe obu Yesu yaabaire ari n’abakuratsi be bashatu?— Eego, Ruhanga ari omu iguru akabagira ati: “Ogu n’omwana wangye ou nkunda, ou nyesiimira munonga.”​—Matayo 17:5.

Yesu butoosha naakunda kukora ebirikushemeza Ishe. Noomanya enshonga ahabw’enki? Ahabw’okuba naakundira kimwe Ishe. Omuntu yaaba naakora omurimo ahabw’okugira ngu naaragiirwa kugukora, nikibaasa kumugumira. Kwonka yaaba naagukora ayekundiire, nikimworobera. Noomanya eki okwekundira kirikumanyisa?— Nikimanyisa okukunda kukora.

N’obu Yesu yaabaire atakaizire mu nsi, akaba akunda kukora byona ebi Ishe yaabaire amushaba kukora. Akaba naakora atyo ahabw’okuba naakunda Ishe, Yehova Ruhanga. Yesu akaba aine omwanya mukuru omu iguru ari n’Ishe. Kwonka Ruhanga akaba ainiire Yesu omurimo gw’omutaano ogu yaabaire naayenda ngu akore. Okubaasa kukora omurimo ogwo, Yesu akaba aine kubanza yaaruga omu iguru. Akaba aine kuzaarwa nk’omwana omu nsi. Yesu akaba ayetebeekaniise kukora ekyo ahabw’okuba Yehova akaba naayenda ngu akikore.

Yesu okubaasa kuzaarwa nk’omwana omu nsi, hakaba haine kugira omukazi owamuzaara. Omukazi ogwo akaba ari oha?— Akaba ari Mariamu. Yehova akoohereza maraika we Gaburieli kuruga omu iguru kugambira Mariamu. Gaburieli akagambira Mariamu ngu akaba naaza kuzaara omwana w’omwojo. Omwana ogwo akaba naaza kwetwa Yesu. Kandi ishe w’omwana ogwo akaba naija kuba ari oha?— Maraika akagira ngu Ishe w’omwana ogwo akaba naija kuba ari Yehova Ruhanga. Niyo nshonga ahabw’enki Yesu yaabaire naija kwetwa Omwana wa Ruhanga.

Nooteekateeka ngu Mariamu ekyo akakitwara ata?— Nooteekateeka ngu akagira ngu, “Tindikwenda kuba nyina Yesu”? Ngaaha, Mariamu akaba ayeteekateekire kukora eki Ruhanga yaabaire naayenda. Kwonka shi Omwana wa Ruhanga ow’omu iguru akaba naabaasa kuzaarwa ata nk’omwereere omu nsi? Okuzaarwa kwa Yesu kukaba kuta okw’omutaano aha kw’abandi abaana? Entaaniso egyo noogimanya?—

Ruhanga akahanga abazaire baitu ab’okubanza Adamu na Haawa ngu babaase kuteerana okubaasa kuzaara. Bwanyima y’ekyo, omwana akaatandikire kukura omunda ya nyina. Abantu nibagira ngu ekyo n’eky’okutangaaza! Nimpamya ngu naiwe ekyo nokiikiriza.

Ruhanga akakora ekirikutangaaza munonga. Akafurura amagara g’Omwana we kuruga omu iguru yaagata omunda ya Mariamu. Ruhanga ekyo akaba atakakikorahoga, kandi takagarukaga kukikora. Ahabw’eky’okutangaaza ekyo, Yesu akatandika kukura omunda ya Mariamu nk’oku abandi baana bakura omunda za baanyinabo. Bwanyima y’ekyo, Mariamu akashwerwa Yosefu.

Obwire bw’okuzaarwa kwa Yesu obu bwahika, Mariamu na Yosefu bakaba batayaayire Betelehemu. Kwonka omuri Betelehemu hakaba harimu abantu baingi munonga. Mariamu na Yosefu tibaratungire kishengye ky’okuraaramu, n’ahabw’ekyo bakaraara omu nju y’amatungo. Omwo Mariamu nimwo yaazaariire, reero Yesu bakamuta omu kaato aku barikuheeramu amatungo eby’okurya, nk’oku orikureeba aha.

Ekiro eki Yesu yaazaariirweho hakabaho ebintu ebirikushemeza. Haihi na Betelehemu, maraika akeeyoreka bamwe aha bariisa b’entaama. Akabagira ngu Yesu akaba ari omuntu w’omuhendo. Maraika akagira ati: ‘Naabareetera amakuru marungi agarikwija kushemeza abantu. Eki kiro orikwija kucungura abantu yaazaarwa.’​—Luka 2:10, 11.

Maraika akagambira abariisa b’entaama ngu bakaba nibaija kushanga Yesu omuri Betelehemu abyami omu kaato. Bwanyima, baamaraika abandi ahonaaho bakeegaita ahari maraika ogwo ow’okubanza omu kuhimbisa Ruhanga. Baamaraika baakeshongora bati: “Ruhanga aheebwe ekitiinisa . . . n’omu nsi obusingye bugirwe abantu abu ashemerereirwe munonga.”​—Luka 2:12-14.

Baamaraika ku baagyenzire, abariisa baza Betelehemu baashanga Yesu ariyo. Ku baahikireyo baagambira Mariamu na Yosefu ebintu birungi ebi baabaire bahuriire. Teekateeka aha kushemererwa oku Mariamu yaagizire ahabw’okwikiriza kuba nyina Yesu.

Bwanyima, Yosefu na Mariamu bakatwara Yesu omu rurembo Nazareesi. Okwo niyo Yesu yaakuriire. Ku yaakuzire, yaatandika omurimo gwe omukuru ogw’okwegyesa. Ogwo gukaba guri gumwe aha mirimo ei Yehova Ruhanga yaabaire naayenda ngu Omwana we akore omu nsi. Yesu akaba ayeteekateekire kukora omurimo ogwo ahabw’okuba akaba naakunda munonga Ishe ow’omu iguru.

Yesu atakatandikire omurimo gwe nk’Omwegyesa Mukuru, akabanza yaabatizibwa omu Mugyera Yorudaani arikubatizibwa Yohaana Omubatizi. Bwanyima hakabaho ekintu kirikutangaaza. Yesu ku yaabaire naaruga ati omu maizi, Yehova yaayema omu iguru yaagira ati: “Ogu n’Omwana wangye ou nkunda, kandi ou nshemerererwa munonga.” (Matayo 3:17) Mbwenu torikushemererwa abazaire baawe baakugira ngu nibakukunda?— Nituhamya ngu na Yesu nawe akashemererwa.

Yesu butoosha akaba akora ebihikire. Akaba ateetwara kuba nka Ruhanga. Taragambiire bantu ngu niwe Ruhanga. Maraika Gaburieli akaba yaagambiire Mariamu ngu Yesu akaba naija kuba naayetwa Omwana wa Ruhanga. Yesu we wenka akagira ngu akaba ari Omwana wa Ruhanga. Kandi akaba atagambira bantu ngu naamanya bingi kukira Ishe. Akagira ati: “Tata nankira.”​—Yohaana 14:28.

Yesu n’obu yaabaire akiri omu iguru, Ishe ku yaabaire amuha omurimo akaba agukora. Akaba atarikugira ngu naija kugukora kwonka bwanyima akanga kugukora. Akaba naakunda Ishe. N’ahabw’ekyo akaba ayorobera Ishe omu bi yaabaire amugambira. Kandi Yesu ku yaizire omu nsi, nabwo akakora eki Ishe yaamutumire kukora. Taramariire bwire bwe aha kukora ebye. Tikirikutangaaza okureeba ngu Yehova naashemezibwa ebi Omwana we arikukora.

Naitwe nitwenda kushemeza Yehova, tikwo?— N’ahabw’ekyo twine kworeka ngu nitworobera Ruhanga nk’oku Yesu yaamworobeire. Ruhanga naagamba naitwe kurabira omuri Baibuli. Nikiba kitahikire kwetwara nk’abarikworobera Ruhanga kwonka tukakora ebintu ebitarikuhikaana n’ebiri omuri Baibuli, tikwo?— Kandi guma noijuka ngu nitwija kushemeza Yehova buzima twaba nitumukunda.