Yesu Kristo Naakora ki Hati?

Omu Okwaikumi n’Abiri abantu baingi omu nsi nibooreka ebishushani bya Yesu nk’omwana. Nibooreka ebishushani bye ari omu kaato aku barikuheeramu ente eby’okurya. Mbwenu shi Yesu hati n’omwereere?—a Ka tugambe aha kintu kikuru eki Yesu arikukora hati. Nitubaasa kwegyera aha kyabaireho obu abariisa b’entaama baabaire bariisize haihi na Betelehemu nyekiro.

Maraika akeeyoreka abariisa b’entaama. Yaabagira ati: ‘Omujuni yaabazaarirwa, niwe Kristo Mukama waitu.’ Kandi maraika akagaruka yaabagira ngu nibaija kushanga Yesu “ashwekirwe omu twenda tw’obwereere, abyamiibwe omu kihongore.” Ahonaaho, baamaraika baingi bareebeka omu iguru ‘nibahimbisa Ruhanga.’

Ku ogire ngu okahurira baamaraika nibahimbisa Ruhanga okaba noija kwehurira ota?— Abariisa b’entaama bakashemererwa. Bakagira bati: “Mwije tuze Betelehemu, tureebe ekibaireyo.” Ku baahikireyo “baashanga Mariamu na Yosefu, n’omwana w’omwereere abyami omu kihongore.”

Bwanyima abantu abandi bakaija Betelehemu ahu Yosefu na Miriamu baabaire bari. Abariisa b’entaama ku baabagambiire ekyabaho, boona baatangaara. Waashemererwa kumanya ebintu birungi ebi?— Twena abarikukunda Ruhanga nitushemererwa. Hati ka tureebe ahabw’enki okuzaarwa kwa Yesu kurikureeta okushemererwa kwingi. Kwonka ka tubanze tureebe ebyabaireho Mariamu atakashwairwe.

Izooba rimwe maraika orikwetwa Gaburieli akataayaayira Mariamu. Akaraganisa Mariamu ngu akaba naija kuzaara omwana, ‘abe mukuru ayetwe Omwana wa Rukira-boona.’ Gaburieli akagira ngu akaba naija ‘kutegyeka,’ nk’omugabe, kandi ngu “obukama bwe tiburihwaho.”

Mariamu akaba naayenda kumanya oku ebyo byona byabaire nibiija kubaho ahabw’okuba akaba atakateeraine na mushaija weena. Gaburieli akagira ati: ‘Amaani ga Rukira-boona garyakusangira,’ kandi omwana “orizaarwa nikyo aryeterwa Orikwera, Omwana wa Ruhanga.” Ruhanga okufurura amagara g’Omwana we kuruga omu iguru akagata omunda ya Mariamu kubaasa kukura hakarugamu omwereere, buzima ekyo kikaba kiri eky’okutangaaza!

Orareebireho ebishushani ebirikworeka ‘abanyabwengye’ bashatu bagiire kureeba Yesu hamwe n’abariisa b’entaama?— Omu bwire bwa Noiri nibakira kworeka ebishushani ebyo. Kwonka ebintu ebyo tibihikire. ‘Abanyabwengye’ abo bakaba nibaraguza enyonyoozi, ekikorwa eki Ruhanga arikwanga. Ka tureebe ekyabaireho ku baahikireyo. Baibuli neegira eti: “Baataaha omu nju, baashangamu omwana na Mariamu nyina.” N’ahabw’ekyo, Yesu akaba atakiri mwereere abyami omu kaato aku barikuheeramu ente eby’okurya, kureka akaba ari omu nju ari na Yosefu na Mariamu!

Abashaija abarikuraguza enyonyoozi bakabona bata Yesu?— Bakeebemberwa “enyonyoozi,” kwonka terabatwire Betelehemu, kureka ekabanza yaabatwara ow’Omugabe Heroode omuri Yerusaalemu. Baibuli neeyoreka ngu Heroode akaba naasherura Yesu kumwita. Hati kiteekateekeho. Noogira ngu n’oha owaatebeekaniise ekintu ekirikushusha enyonyoozi kwebembera abashaija abo kubatwara owa Heroode?— Ti Ruhanga ow’amazima Yehova, kureka n’omuzigu Sitaane Omuregi.

Obunaku obu, Sitaane naareetera abantu kuteekateeka ngu Yesu n’omwereere otarikubaasa kwehwera. Kwonka maraika Gaburieli akagambira Mariamu ngu Yesu akaba naija kutegyeka nk’omugabe, kandi ngu obukama bwe bukaba butarikwija kuhwaho. Hati Yesu naategyeka nk’Omugabe omu iguru kandi ari haihi kwija kucwekyereza abazigu ba Ruhanga. Eki nikyo tushemereire kuguma nitumanya ahari Yesu, kandi twine n’okukimanyisa abandi.