Yesu Okushemeza Hekalu

Yesu akaza Yerusaalemu omu gwa 30 Y.A.K. Abantu baingi bakaba baizire omu rurembo aha Kuhingurwaho. Aha Kuhingurwaho okwo, bakaba bahayo ebitambo by’ente nari entaama aha hekalu. Abantu abamwe bakaba baija n’enyamaishwa zaabo, kandi abandi bakaba bazigura omuri Yerusaalemu.

Yesu ku yaagiire omu hekalu, akareeba abaabaire nibagurizamu ente n’entaama. Bakaba nibakorera eby’obushuubuzi omu nju ya Yehova ey’okuramizamu. Yesu akakora ki? Akakwata emigoye yaagigira nk’orukoba, yaabinga ente n’entaama omu hekalu. Akajuumika emeeza z’abaabaire nibakora eby’obushuubuzi kandi yaashuka ahansi esente zaabo. Yesu akagambira abaabaire nibaguza enkombe ati: ‘Mwiheho ebi; enju ya Tata murekye kugigira enju y’abashuubuzi.’

Abantu abaabaire bari aha hekalu bakatangaarira eki Yesu yaakozire. Abeegi be bakaba nibaijuka obunabi obwabaire nibukwata ahari Mesia oburikugira buti: ‘Niinyija kukundira kimwe enju ya Yehova.’

Bwanyima, Yesu akagaruka yaashemeza hekalu omurundi gwa kabiri omu gwa 33 Y.A.K. Akaba atarikubaasa kwikiriza omuntu weena kushiisha enju ya Ishe.